Ministera gonkungwe nsitwe Indileni Daniel katente asi mavango aga gevhu vakeverera kunakugava nondja, mema, yirugana, mparukiso ntani nompito dokulisiga siga unene nye omu sina kara sirongo nouhwi waso.

Evhu vana kupira kukeverera ndi kuruganesa, hawe kuretesapo ruhepo ntani kuparuka mounarunsigwe, siruwo oso evhu kuna kara nye asi kunakuliruganesa nokukara nye mewogo. Age kageve nonkango edi posiruwo sosilika sokudiworoka ezuvha lyokutara asi vahazonagura runone ntani ruteni oru runa kara moGobabis sinkwa ntani.

Moomu tupu yakara yirongo yoyinzi, Namibia nage yimo ngorooro nage kuna mugumu kuzonagura ufwandi ntani ruteni, morwa eyi yakuyininkisa ngoso morwa mparukiso tuna kara nazo pwantani, omu runa kara ruteni, ntani omu nye vana kuparuka vantu betu, nomutupu vana kugendesa yimuna ndi yiweka yawo, omu vana kuteta yitji, kudipaga yikorama, ntani kuzeresa nye kupire yitji ngoso kuna kuzonagura nye evhu.

Mokuwapukurura nye nayinye eyi, kuteta yintji norukukutu, epangero alyo kuna kupungura nye monondima dopantani, kuweka nomfi ntani kuzangura nye mema moruha rwantani.’’ Ose kuna kutura nye maudigu gakare ngwendi nompito nye donongwa tuna gwana, omu nye tuna tura asi kuteta yitji asi yomakara naninye kuna kuzonagura wiza, kunakuzonagura malisiro, ntani ekonomi nalyo kuna kuyipa, yimo ana kutanta Daniel.

Age katente asi awo kuna kugwana mbatero nombunaga dina kugava simaliwa, omu vana kupura nkarapamwe ntani nombunga dopaumwene, nokutamununa mokukava mapukururo nomu navavatera vanandima mokugava nombudi valiwapayikire nsene pana wiza ruteni. Age kagwedereko hena asi Namibia hawe kuna kumupandura omu vana kulimbururako, ntani kuna kugwana magano koUnited Nations Convention ava vana kurwanesa kutenta yitji, nomu nye vana lituramo asi ngapi naturuganesa evhu asi twahaliruganesa mepuko eyi ngayikara asi dogoro mo2040 trwahepa nye kupitira monkarapamwe omu navagwana malisiro, mema vagazangure, ntani ufwandi omu navaukeverera nevhu lyeeli.

Daniel simpe katente asi kapi vana hara kusigako magano aga vakara nago vakondi vetu, awo navaruganesa nokomitiyee domomukunda omu navaruganesa magano -konondima varuganese egano lyantani nokukeverera evhu.

Munasipundi gombunga zaNamibia Chamber of Commerce and Industry momukunda gwaOmaheke, Kaiko Tjiramba katamwinine sihuyungwa esi nokutanta asi kuteta yitji twahepa kuyitjindja tuyiruganesa mokugusapo ruhepo, asi twahepa kuruganesa makara aga monaruwa, rukukutu, ntani kugava yirugana kovantu wokonomukunda.

Tjiramba kageve yitundwamo asi mo 2025 mwelike, Namibia kwatumine makara gokusika konotona 134 300 zomakara ano payimaliwa kuna kara nye N$1.3 biliyuna nokuyitanta paveta asi mukunda gwaOmaheke ntani Otjozondjupa awo kuzangura 70% mwaza sirongo nasinye makara ngelike ngoso, makura yipo nye yina kara asi ngesefa ezi zoma kara mulyo unene azo hena kuna kugendapo nawa. Julia Kamarenga murugani koministeli zomapukururo moOmaheke.

The post Evhu kuna kara simwe setu somulyo unene – Daniel appeared first on New Era.