Auleria Wakudumo

Kampani yebona zakupanga bucwala ili yezibahala kaNamibia Breweries Limited (NBL) inyatezi buitamo bwayona hala kunwa ni kukwaeza. NBL nesulile N$200 000 kushangula ni kutiiseza mungendenge wakutusa kufukuza likozi zafamukwakwa, zengunganywa kwakunwa ni kukwaeza kutusa naha kufukuza likozi zetiswa kibatu babakozwi.

Mungendenge nohatisizwe mwaWindoko Labune mwaswalisano ni katengo kakatalima zabuiketo famukwakwa ili kakazibahala kaNamibian Road Safety Forum (NRSF), ni Mutayi Wasipokola obona zalimamela zafamukwakwa. Mungendenge ukamata kukala kweli yetaha kuisa Sope 2027.

Mungendenge ukabona libaka zamiseco zelobañwi, teñi bababona zalimamela zafamukwakwa bakatatuba limotikala kubona kana balatelela milao yafamukwakwa, kungelela cwalo nikuba ni mañolo aswanela abukwaezi, kusebelisa makanda, mayemo amawili ni limotikala zeswanela kuba famukwakwa.

Mungendenge hape ulela kubuyelisa bakwaezi fa 300 famuseco ni museco kubona kapa basweli kukwaeza bakozwi famukwakwa mwanaha Namibia. Muzamaisi wakampani yaNBL Waldemar von Lieres naize kampani yepanga bucwala itamile kubabaza kunwa kaswanelo nikutibela likozi zetiswa kibucwala.

“Mayemo aluna akwaluhile nikuyelela. Lulumelelana nikunwa katokomelo ni kaswanelo, kono haukwaeza, usike wanwa bucwala, mi haunwa bucwa, usike wakwaeza,” nabulezi. Von Lieres naize nihakulumelwa kuli kukwaeza kamafosisa, kukwaeza kufita tikanyo ni sebeliso maswe yabucwala libapala kalulo mwalikozi zafamukwakwa, kono naha Namibia haina hande bupaki sakata kuli bucwalo butisa cwañi likozi zafamukwakwa.

Naize mungendenge omunca ubata kutiba masuba kakukopanya kutaleleza limamela zafamukwakwa ni kufumana bupaki sakata. “Bupaki boo bukatusa mubuso, bababona zalimamela zafamukwakwa kuli baeze liketo zelukela, bana nizibo yeswanela habaeza liketo kumbweshafaza buiketo famikwakwa mwanaha Namibia,” nabulezi.

Katengo kakabona zasilelezo yafamukwakwa nekaize mulelo woo kimuhato sakata kuli kuyoliswe mabulatwi ni bupaki. Muzamaisi wakatengo Horst Heimstädt napatuluzi kuli lipiho zesikanitifazwa lisupeza kuli Namibia nebihile likozi zafamukwakwa zelikana 1 287, kutisa likolofalo zelikana 2 189 nimafu alikana 220 kuzwa makalo asilimo se.

Yomuhulu walimamela zafamukwakwa Petrus Swartz maize mulelo ukahulisa silelezo yafamukwakwa. “Kakuba bababona zalimamela zafamukwa, lubonanga lapilli zetiswa kikukwaeza kamafosisa ni kukwaezwa mwamandingwe,” nabulezi. Nafile mamela kuli bakwaezi babakafumanwa bakwaeza bakozwi bakatalimana ni mulao.

The post NBL iminihanya kulwanisa kunwa nikukwaeza… isula N$200 000 kutibela likozi zafamukwakwa appeared first on New Era.