Edimbuluko lefiku loHIV/AIDS neudo oli li kOshikoto

Ouministeli wouhaku nOnghalo nawa owapitifa onhumwafo kutya edimbuluko lefiku lomukifi wo Aids, ota li kadimbulukilwa koshitukulwa shaShikoto.

Oshitukulwa shaShikoto osha didilikwa kutya osho shina omwaalu uli pombada momivalu dovanhu tava lumbu nombuto yoHIV/AIDS moshilongo, nomolwa omivalu edi, Ouministeli wOuhaku nOnghalonawa, neudo owa hoolola odoolopa yaTsumeb meni loshitukulwa opo mu ningilwe efiku ledimbuluko lomukifi woAids mounyuni, la shivika onga oWorld Aids Day, nelalakano oku xwaxwameka eudeko, eameno, nekeelelolo letandavelo lombuto oyo.

Odula yadjako oshitukulwa oshali shalopotwa shina omwaalu wovanhu tava lumbu nombuto ei veli peepelesenda 16, osho shaeta oshitukulwa shikale shili poutivali moshilongo konima yoshitukulwa sha Zambezi osho shali ponhomola yotete neepelesa 22.

Omunambelewa omukulunhu wokoshikondo shouhaku Penda Ithindi okwa ti nonande epangelo tali kendabala oku kala lafya oshisho kutya omiti doku kwafa ovanhu tava lumbu nombuto yoHIV/AIDS omo dili moshitukulwa da wana, natango omwaalu wovanhu ava va didilikwa vena ombuto ei onghee ngaho taupula komesho.

“Ashike nande ongaho fye onga ouministeli otwa hala oku pandula oipangelo, oshoyo ovapangi molwa elitulemo lavo, unene ngeenge tashi ya pefiloshisho lovanhu tava lumbu nombuto ei,” Ithindi ta ti.

Ouministeli natango owa hololela oshitukulwa olupandu molwa elitulemo lasho ngeenge tashi ya pokuyandja omiti kovanaudu efimbo alishe, opo va dule okukaleka po oundjolowele wavo.

Ashike nande ouministeli wa tanga Oshikoto molwa oilonga yomupondo, oshitukulwa otashi kumaidwa shili humate nawa ngeenge tashiya peemhito odo hadi dulu oku etifa etandavelo lomukifi ou.

Ovanambelewa ava hava longele koshikondo sheameno lomukufi wo HIV/AIDS otava indilwa kepangelo veli tulemo mokuyandja ehongo unene ngeenge tashiya poku yandja ehongo kounona vavanini ovo vadalwa nombuto ei voo tava kulu tavanu omiti oshoyo ounona vedula dopokati veli momashongo oinima ngaashi omilele inadi amenwa, omo vahapu vaningwa oihakanwa.

Ouministeli natango owa yelifila yoo ovanambelwa vakumaide oshiwana, unene ovanysha ovo ina vahala okunwa omiti ile veudite valoloka, vatwikile opo ashike vawedeko keedula deenghalamwenyo davo.

Ehoololo lo doolopa yaShikoto oko kwa tengenekwa kuka tyapulilwe oshivilo eshi, itashiningwa ashike ngeno pamufika wopashitukulwa, ndele opamufika woshilongo ashishe koonono.

Omunisteli owa tengeneka uka tyapule efiku eli metivali lo 1 Desemba 2026 Tsumeb.

Ouministeli natango otau pula ovamibia aveshe koonono, veuye vakufe ombinga shaashi otaku kakala yoo kuna omahongo a yooloka ta a tungu eenghalamwenyo.

[email protected]

The post Edimbuluko lefiku loHIV/AIDS neudo oli li kOshikoto appeared first on New Era.