Elikufa omwenyo konima yokulekelwa moshipangelo

Opolifi moshitukulwa shaShikoto oya lopota omulumenhu womumukunda Iindongo Yakeelu weedula o54, eli kufa omwenyo.

Omulumenhu okwa tongololwa onga Jeconia Nailenge.

Nailenge okwa lopotwa eli tuwa kovafita voimuna vali va kongo oikombo yavo, ovo va hanga eli mangeleka momuti weno nomufuwa. Vati omulumenhu ou oshinima eshi okwe shi ninga konima eshi a lekelwa moshipangelo shaMuthiya, omo a ninga efiku meembete.

Omukulunhu wopolifi moshitukulwa shaShikoto Commissioner Ndafudha Iifo okwa ti Nailenge ookwa kana Etitatno lomafiku 4 Novemba 2026, ashike olopota inasha nekano laye kopolifi oya fika ko momafiku a6 Novemba 2026.

Iifo okwa twikila kutya natango moshitukulwa shaye omwa holoka oshiningwanima shoshiponga osho sha twaalela omwenyo wokanano keedula nhano.

Iifo okwa ti ounona ava vavali, kamwe oke na eedula nhano nakakwao nhatu, ova lopotwa vali tava danauka noshipilaatusha, osho konima yokudanauka veke shi tila pomundilo ndele tashi xwama noku va monifa oshiponga.

“Konima ovadali ova twala ovana koshipangelo shaMuthiya oko ina va kundwa noku tuminwa koshipangelo sha Nandjokwe meendelelo oko vatwalwa veli monghalo iheli nawa nande nande,” Iifo ta yelifa.

Konima yomafiku atano okaana kamwe oka xulifa omanga kakwao natango taku hokololwa keli monghalo iheli nawa nande nande.

Iifo okwa ti opolifi otai ningi omakonaakono onomena wina moshinima eshi.

Opolofi oya kunghilila ovadali vakale ohanda nokufila omaludalo avo oshisho unene ngeenge tashi ya pokudanena oinima, oshoyo oku takamifa omalinyengo avo noilonga yavo efimbo keshe, opo vakeelele oiponga yoludi eli.

The post Elikufa omwenyo konima yokulekelwa moshipangelo appeared first on New Era.