Kampala: Abacuruzi batangiye imyigaragambyo yo kwanga gucuruza
Abacuruzi bo mu Mujyi wa Kampala muri Uganda batangiye imyigaragambyo yo gufunga amaduka yabo bigaragambiriza imisoro bavuga ko ihanitse, gutinda kurekurwa kw’ibicuruzwa bitumizwa mu mahanga n’uburyo Urwego rushinzwe Imisoro n’Amahoro (URA) rukoresha mu kugenzura ubucuruzi no gusoresha.
Kuva mu gitondo cyo kuri uyu Kabiri, tariki ya 17 Ugushyingo 2026, ibikorwa by’ubucuruzi byahungabanye mu bice bitandukanye by’uyu mujyi, nyuma y’uko abacuruzi bo mu Ishyirahamwe ry’Abacuruzi bo muri Kampala (Kampala City Traders Association ) bafunze amaduka mu rwego rwo kotsa igitutu Guverinoma ngo yumve ibibazo byabo.
Iri shyirahamwe ryari ryasabye abacuruzi guhagarika ibikorwa byabo mu gihe cy’ukwezi kumwe, rivuga ko hari amabwiriza agenga imisoro na gasutamo abangamiye ubucuruzi, cyane cyane ku bacuruzi batumiza ibicuruzwa mu mahanga.
Mu duce dutandukanye twa Kampala, amaduka menshi yafunze imiryango ndetse n’inzu nini z’ubucuruzi muri uwo mujyi ziriwe zifunze.
Abacuruzi bavuga ko bahangayikishijwe n’imisoro basabwa ku bicuruzwa bitumizwa mu mahanga, gutinda kwa serivisi za gasutamo, ibituma bacibwa mafaranga menshi yo kubikirwa ibicuruzwa kuko biba bimaze iminsi byaraheza kuri za gasutamo.
Banenga kandi uburyo Urwego rushinzwe Imisoro n’Amahoro (URA) rukoresha mu itangwa ry’inyemezabuguzi no gukurikirana iyishyurwa ry’imisoro.
Umuyobozi w’abacuruzi bakorera mu nyubako z’ubucuruzi muri Kampala, Charles Yiga, yasabye abacuruzi gusubira mu kazi, abibutsa ko iki ari igihe cy’ingenzi cyo kwinjiza amafaranga bitewe n’uko abantu baba bitegura iminsi mikuru ya Noheli n’Ubunani.
Umuyobozi w’Ishyirahamwe ry’Abacuruzi n’Abikorera muri Uganda, Edward Ntale, we yavuze ko ikibazo cy’imisoro kitagomba kureberwa gusa mu mikorere ya URA, kuko ari Guverinoma ishyiraho amategeko n’amabwiriza uru rwego rushyira mu bikorwa.
Minisitiri w’Imari,Henry Musasizi, yavuze ko ku wa 19 Ugushyingo 2026, bazaganira n’abacuruzi ngo bahoshe uburakari bwabo.
Ubucuruzi bwiriwe bwahagaze i Kampala (ifoto ya Nile Post)
MUGIRANEZA THIERRY/ UMUSEKE.RW
Follow the story
About this article
- Length
- 272 words · 1 min read
- Published
- November 17, 2026
- Byline
- MUGIRANEZA THIERRY
- Source
- Umuseke