Oshiwana sha indilwa shi ka yandje ohonde

Hambeleleni Daniel

Ehangano lo Blood Transfusion Service of Namibia (NamBTS) ota li indile ovakwashiwana va holoke momwaalu muhapu okuliyamba okuyandja ohonde opo ku xupifwe oshiwana osho shili momhumbwe yohonde.

Ehangano eli mOsoondaxa ota li ka kala moWindhoek opo ovakwashiwana ava vena ehalo lokuyadja ohonde va ka longife omhito ei okuxupifa eemwenyo dovanhu omayovi ovo veli momhumbwe.

Elalakano lehangano eli ngeno okukala la mona ovanhu tava yandje ohonde va fika po 70 moWindhoek.

Ovati ohonde ohai kala unene ya pumbiwa ngeenge omunhu adja moshiponga shotuwa ile oshiponga shonhumba osho sha eta omunhu a dje ile a pumbwa ohonde, oomeme ngeenge opo va mono ounona, ounona navo ohava pumbwa ohonde ,omunhu opo adi koshitandelo ilo omunhu ena omukifi wokaangela.

Kouyelele wa dja komunambelewa wehangano lohonde moshilongo Salmi Shigwedha, okwa ti okukufwa ohonde i ha ku pula lela efimbo lihapu ndelo o ha ku pula ashike ominute 20 ilo 30 lwaapo.

Shigwedha okwa ti ohonde yomunhu umwe otai dulu okuxupifa eemwenyo dovanhu vavali.

Onghee ehangano eli ota li pula ovanhu opo va etelele okaume vavo,ovakwanedimo vavo osho yo ovanailonga pamwe navo va kufwe ohonde.

Omunhu ou ta kufwa ohonde nakale eli pokati keedula 16 no 65 vena oshivixa okudja po 50Kg ena oukolele.

Ovanhu ava tava ka kufwa ohonde otava kunghililwa opo va kale valya oikando itatu meevili nhatu ile nhee manga inava kufwa ohonde.

Okwa ti natango nava kale vanwa omeva ilo omeva oyiimati manga inava kufwa nokonima va kufwa ohonde.

Natango otava kumaindwa opo va ha ninge omadewo konima yokuyandja ohonde.

NamBTS okwa ti keshe ou taka kufwa ohonde ota ka pewa omaano.

Oyeedifo yoshali opo tai ka kala novanhu ava ve na ehalo nava dengele kombelelwa yoNamBTS.

–hambelelenidaniel56@gmail.com

The post Oshiwana sha indilwa shi ka yandje ohonde appeared first on New Era.