Va talela po ombila yomukondjelimanguluko mOkandongwena

**Hambeleleni Daniel **

Ovakalimo vomomukunda Okandongwena moshitukulwa shaShana ova dimbulula ombila yomukondjelimanguluko Simon Shingo a shivika nawa nedina lomoita ‘Ndiki shokOndipo’ oo a xulifila moita pefimbo lekondjelo manguluko mu Septemba mo 1979.

Ombila e i okwa li ya talelwa po kovanhu okudja keembinga neembinga omo mwa kwatelwa novakwanedimo ya nakufya, ovanamukunda osho yo Kansela woshikandjohoololo shaNgwediva Johannes Ngololo.

Amandus Lukas a shivika nawa nedina lomoita ‘Shiweda’ okwa hokolola kutya efiku eembulu deva ponokela opo nakufya ou a yashwe, okwa ti ka kwali shipu nande nokwali sha lula lela.

Okwa ti oita yoovene oya tamekele efimbo longula ndele na ke mu twaalele okomatango.

Okwa ti fiku olo polwoodi opo opwa kanena eemwenyo dovanhu va fika po 11.

“Eshi ngaho vakwetu ovo veli 11 va xulifa, nafye eembulu dihapu otwa fiya twedi nangeka nonda dile po omandi ketako noinima yavo nokuli opo vei fiile opo,” Lukas ta ti.

Okwa holola yo kutya nonande va kondjela oshilongo eshi, ovanhu vahapu ali navo moita epangelo ina li va tala. Onghee ota indile epangelo opo li ninge po sha okukwafa ovakondjelimanguluko.

Ngololo okwa ti okwa pandula eshi ovakwashiwana tava dimbulula eembila ndovakondjelimanguluko noku shi fikifa kombelewa yaye.

Okwa ti elalakano okukaleka po ondjokonona yoshilongo opo i shiivike nokomapupi ta eya.

“Ngaashi okudja apa paife ombila e i ohatu ke i tulifa momake ombelewa yovakodjelimanguluko yo yuuye ilongwe nawa,” Ngololo ta ti.

[email protected]

The post Va talela po ombila yomukondjelimanguluko mOkandongwena appeared first on New Era.