Ompangu otayi gandja etokolo kombinga yeindilo lya gandjwa mompangu meendelelo komunandjungu Michael Amushelelo ta indile epangelo li kuthepo omainda gokushunitha pevi ondapo yiihauto, ngoka ga tulwa mopate yoWestern Bypass mOvenduka, ongula.
Ehangano lyokutonatela oopate moshilongo lyedhina Roads Authority, melongelokumwe nUuministili wIilonga nIiyenditho okwa li ya tsu kumwe okutula omainda gokushunitha pevi ondapo yiihauto mopate onene yooshambali ndjoka ya tseyika nawa nedhina B1 Western Bypass.
Opate ndjoka yoB1 Western Bypass oya andjuka nohayi longithwa wo kiihauto mbyoka tayi ya moshilandopangelo nenge tayi zi mo.
Omupanguli Gabriel Komboni okwa lombwele Amushelelo mOmpangu yoPombanda yaVenduka, mEtiyali, kutya etokolo kalya li lya.
Meindilo ndyoka Amushelelo otiindile ompangu yi gandje etokolo kutya okutula omainda mopate ndjoka kashi li paveta, ishewe kashili momuhingo gOveta yOopate nIihauto yo-1999.
Otiindile ompangu yi gandje elombwelo kuminista gwiilonga niiyenditho osho wo Roads Authority ya kuthepo omainda ngoka meendelelo, nenge shi ningwe muule woowili 24 konima elombwelo ndyoka lya gandjwa kompangu.
Lwahugunina, Amushelelo okwiindile ompangu yi gandje elombwelo kuminista osho wo koRoads Authority kaaya tule we omainda moopate oonene dhomoshilongo.
Omwedhi gwa zi ko minista gwiiyenditho Veikko Nekundi okwa popi kutya etokolo lyokutula omainda mopate olyopakathimbo, nomathaneko opo ge li nale opo ku ka tungwe oontopa dhaayendi yokoompadhi monakuyiwa.
Nekundi okwa popi kutya etokolo lyokutulapo omayinda olya ningwa sho kwa taliwa komwaalu gu li pombanda gwaantu taya pumwa kiihauto mopate ndjoka.
Okwa popi kutya aaniihauto olundji ohaya hingi uukodhi tawu ka lala pethimbo lyongula nenge pomazimbukilo, itaaya dhiladhila oomwenyo dhaayendi yokoompadhi mboka taya taaguluka opate.
Okwa popi kutya numvo okwa lopotwa iiponga oyindji yaantu ya lyatwa kiihauto.
The post Etokolo lyomainda gokoWestern Bypass otali gandjwa ongula appeared first on The Namibian.
