Eenhana tadi longekida efiku lomaudano

EENHANA- Elelo lodoolopa yaEenhana ota li pula oshiwana opo shi li shangife shi ka kufe ombinga moudano tau ka kala ko momafiku 27-29 omwedi ou.

Omupopiliko wodoolopa yaEenhana Martin Simeon okwa ti odoolopa yavo otai ka unganeka oudano ou nelalakano lokueta ovanhu vahafele pamwe.

Okwa ti otaku kala oudano womaludi a yooloka ngaashi okatanga kokeemadi, oudano wokutondoka, okatanga komokambamba nosho tuu omaludi oudano amwepo.

Okwa pula oshiwana opo shi talelepo eembelewa delelo lodoolopa ndele tashi pula ouyelele welixwapo.

“Efiku laxuuninwa loku li shangifa omafiku 20 omwedi ou. Osha fimana opo oshiwana shi li shangife pefimbo opo kukelelwe ovanhu tava kala ina va kufa ombinga,” ta ti. Okwa ti otakanga kokeemadi kongudu yovanyasha otave li shangifa koshimaliwa shi fike poN$1500.

Omanga okatanga kokeemadi kongudu yovakunhu otave li shangifa koshimaliwa shi fike poN$1000.

Okatanga kokeenyala ovanhu otave li shangifa koshimalilwa shi fike poN$800, omanga okatanga komokambamba ovanhu otave li shangifa koshimaliwa shi fike poN$800.

Simeon okwa weda po ta ti oudano wokutondoka omunhu keshe ote li shangifa koshimaliwa shi fike poN$100. Okwa ti ovanhu tava ka findana otava ka pewa omakopi, eembadi osho yo oimaliwa keemuna.

“Oshipana ei tai ka findana ponomola yotete ya fiya po omaludi omaudano ayeshe otai ka pewa oshimaliwa kemuma shi fike poN$90 000,” ta ti.

Simeon okwa kumaida ovanhu tava kufa ombinga ovo va tameke nale okuninga omadeulo nalalakano loku li longekidila oudano osho yo okukala va findana. Okwa yelifa ta ti eefikola nado oda manguluka okukala da li shangifa okukufa ombinga koudano ou. Okwa ti oudano owa fimana shaashi otau xwaxwameke oukumwe nombili ngeenge tashi pitile ngeenge ovanhu va hangana pamwe.

“Oudano natango otau yandje omhito kovanhu va longife ounongo wavo tashi pitile momaludi oudano a yooloka,” ta ti.

Simeon okwa ti pefimbo loudano ou kokapale otaku kalandifwa oikulya noikumwa, onghee eshi otashi yandje omhito kovanyasha va ngeshefa oinima yavo ndele tava mono oyuyeemo.

“Odoolopa yaEenhana otai kakala ihadi pefimbo loudano ou. Ileni mu tale omanyakwa eshi taa nhuka mombada,” ta ti.

*[email protected] *

The post Eenhana tadi longekida efiku lomaudano appeared first on New Era.