Somalia oo guul ka gaartay tartanka FIFA U-15 World Cup (Sawirro)

Xulka qaranka Soomaaliya ee ciyaartoyda da’doodu ka hooseyso 15 sano (U15) ayaa guul muhiim ah ka gaaray kulankoodii ugu horreeyay ee tartanka caalamiga ah ee FIFA U15 World Cup & Festival 2026, kaas oo ka socda magaalada Baku ee caasimadda dalka Azerbaijan.

Xulka Soomaaliya ayaa ciyaar xiiso badan oo dhex martay kaga adkaaday xulka Puerto Rico natiijo dhan 3-1, taas oo bilow wanaagsan u noqotay safarka ay da’yarta Soomaaliyeed ku leeyihiin tartankan caalamiga ah.

Xiddiga da’da yar ee Ismaaciil Maxamed ayaa ahaa halyeygii kulanka, kaddib markii uu dhaliyay labo gool, isla markaana uu baas muhiim ah ka geystay goolka saddexaad ee xulka Soomaaliya.

Bandhigga wanaagsan ee Ismaaciil ayaa u suurtageliyay inuu ku guuleysto abaalmarinta Ciyaaryahanka ugu Wanaagsan Garoonka (Man of the Match), taas oo muujinaysa doorkii weynaa ee uu ka qaatay guusha xulka qaranka.

Guushan ayaa muhiimad gaar ah u leh kubadda cagta Soomaaliya, maadaama ay da’yarta qaranka siinayso fursad ay ku muujiyaan kartidooda, kuna kasbadaan waayo-aragnimo ay kula tartamaan xulalka dalalka kale.

Natiijada kulanka ayaa sidoo kale dhiirrigelin u noqon karta ciyaartoyda iyo bahda kubadda cagta Soomaaliyeed, iyadoo muujinaysa muhiimadda ay leedahay maalgelinta iyo horumarinta ciyaartoyda da’da yar.

Kulanka ayaa ka dhacay garoon ku yaalla xarunta ciyaaraha ee Hövsan, magaalada Baku, waxaana si dhow ula socday safiirka Soomaaliya u fadhiya dalka Azerbaijan, Cabdinur Daahir Fidoow, oo garab istaag u muujiyay ciyaartoyda da’yarta ah ee dalka matalaya.

Guusha ay Soomaaliya ka gaartay Puerto Rico ayaa rajo wanaagsan gelinaysa taageerayaasha kubadda cagta Soomaaliyeed, kuwaas oo rajeynaya in xulka U15 uu sii wado bandhiggiisa wanaagsan inta uu tartanku socdo.

Xulka qaranka Soomaaliya ee da’doodu ka hooseyso 15 sano (U15) ayaa la ciyaari doona xulalka Venezuela iyo New Zealand maalinta Axadda, 25-ka October 2026, tartanka FIFA U15 World Cup & Festival 2026 oo ka socda magaalada Baku ee dalka Azerbaijan.

Sida ku cad jadwalka kulamada soo socda, Soomaaliya ayaa marka hore wajahaysa xulka Venezuela, iyadoo kulankaas loo qorsheeyay inuu bilowdo 9:15 subaxnimo.

Kulanka labaad ee isla maalintaas, xulka Soomaaliya ayaa la ciyaari doona New Zealand, waxaana la qorsheeyay inuu bilowdo 4:30 galabnimo.

Kulamadan ayaa imanaya kaddib markii xulka da’yarta Soomaaliya uu guul 3-1 ah ka gaaray Puerto Rico kulankiisii ugu horreeyay ee tartanka. Ismaaciil Maxamed ayaa kulankaas dhaliyay labo gool, sidoo kalena caawiyay goolka saddexaad, isaga oo ku guuleystay abaalmarinta ciyaaryahanka ugu wanaagsan kulanka.

Taageerayaasha kubadda cagta Soomaaliya ayaa rajeynaya in xulka qaranku uu sii wado bandhiggiisa wanaagsan, isla markaana uu guulo kale ka gaaro kulamada soo socda.

Jadwalka kulamada Soomaaliya:

Venezuela Soomaaliya — 25-ka October, 9:15 subaxnimo.
New Zealand Soomaaliya — 25-ka October, 4:30 galabnimo.

HOOS KA DAAWO SAWIRADA