Mamili ubata kozo, ukalimela manzwi akauhanya

CHINCHIMANE – Mulena waKhuta yaMafwe George Simasiku Mamili VII ukupile balateleli bahae ni sicaba kaufela mwasikiliti saZambezi kukumalela swalisano, ni kupila mwakozo, mi nakalimezi lipulelo ni likezo zetisa mifilifili.

Mwamanzwi ahae kwasicaba sahae ni bane bamemilwe bane batile kabuñata kanako yakutabela mukiti wasizo wasilimo waLusata kwamuleneñi wakhuta yaMafwe kwaChinchimane Lasunda, Mamili naize kutiya kwasicaba saMafwe kutomami “mwakopano ni swalisano yesanyanganyi.”

Nasusuelize sicaba saMafwe kusiyala mwaswalisano nihakuna ni kushelana maikuto, maemo amutu, kopano yalipolitiki kobawela kamba kobapila. “Kakuba sicaba saMafwe, nako kaufela lwautwisiswa nikuitumela kuli kutiya kwaluna mwakopano yaluna ni swalisano yesanyanganyi,” nabulezi.

Muzamaisi wasizo nabulezi hape kuli swalisano yeswana yatokwahala mwahala sicaba kaufela mwasikiliti saZambezi kuli zwelopili ni kupila kakozo libe teñi. “Lu ikabela bukamuso bobuswana kakuba babapila mwasikiliti se. Zwelopili, kueza hande ni kupila mwakozo likona feela kuezahala halusebeza hamoho nikufana likute,” nabulezi.

Mamili naize kushelana maikuto haiswaneli kuba simbule sa lindwa. Pizo yahae netile kanako yakutabela mukiti waLusata wasilimo one utisize hamoho sicaba saMafwe, baeteleli basizo, babeleki bamubuso ni baenyi kuzwelela mwanaha Namibia, Zambia ni Botswana kutabela sizo saMafwe.

Mamili naize mukiti kiofita kutabela sizo, mi naize ki kolo yakubukeleza sizo, kukukeka bokukwaluna, kubabaza lituto zasizo ni kutambeka zibo kubabanca. “Mukiti waLusata uluhupulisa kuli kiluna bomañi nikuli luzwa kai,” nabulezi.

Nasusuelize sicaba sahae kuhana lipuo zetisa mifilifili, sitoyo ni likauhano, nikuli bazwisezepata kuambolisana ni kufana likute. Mamili nasebelisize nako yeo kuitumela kwamubuso kakutahisa zwelopili mwalibaka zewela mwakamaiso yaMafwe ni sikiliti kabupala, kungelela cwalo ni tuto ni miyaho. Hala zeñwi nasupile kuyahiwa kwamiyaho kwalikolo zaMasokotwani ni Liselo, mi naize miyaho yeo ikatusa baituti bane bazamaya misipili yemitelele.

Mulena hape nakupile kekezo kwakukulisa kwamuseto ki sisole sanaha Namibia, kwamiseto ni linaha zaBotswana ni Zambia, mi nasupile busholi bwalikomu ni bubangoki kwamiseto zekataza sicaba kwamiseto. Mamili naitumezi kwabapoti kuzwelela linaha zeli bukaufi kutaha kwamukiti, mi naize kucincana lizo mwahalaa linaha kukoniseza litaba zakale ni tamahano yamabasi.

The post Mamili ubata kozo, ukalimela manzwi akauhanya appeared first on New Era.