Unam taka kala nomafiyafano oidano yopamufyuululwakalo

ONGWEDIVA- Oshiputudilo shaUnam shoHifikepunye Pohamba mOngwediva otashi ka kala nefiku shomakondjifafano oshivilo shoidano shopamifyuululwakalo momafiku 24 omwedi ou.

Okwa teelika eefikola osho yo oiputudilo ya yooloka opo i kale ya kufa ombinga momakondjifafano oidano yoshiwambo osho yo okuninga oinyangadalwa ya yooloka.

Okwa didilikwa pefimbo eli eefikola da yooloka monooli osho yo oiputudilo yopombada de li pyakidila nokuninga oivilo yomifyuululwakalo.

Omulihongi moshiputudilo shaUNAM mOngwediva nokuli omuunganeki woshivilo eshi, Kandume Seblon okwa ti oshivilo eshi osha fimana shaashi otashi yandje ehongo kombinga yefimano lomufyuululwakalo kovanafikola.

“Osha fimana ovanafikola novalihongi ve na eudeko kombinga yomufyuululwakalo shaashi eshi otashi va xwaxwameke va kale ve na omikalo diwa,” ta ti.

Okwa ti weda po ta ti osha fimana ngeenge eefikola noiputudilo tai twikile okukala tai ningi oitufi yoludi e li.

Okwa yelifa ta ti oivilo yomifyuululwakalo otai yandje eudeko lomoule kovanafikola va kale va fimaneka omufyuululwakalo wavo neenghunghedi doshiwambo.

“Omufyuululwakalo otau etele ovanafikola omauwa ngaashi okukala ve shi oilonga yOshiwambo hai longwa koukadona novamati. Ovanafikola va kale ve shi nghene ovakulunhu hava kundwa,” ta ti.

Okwa weda po ta ti ngeenge okaana oke na eudeko kombinga yomufyuululwakalo ota ka kala ke na oumbada wokulonga oimbuluma osho yo okulongela vakwao omunyonena.

“Omifyuululwakalo ota di kwafele nghene okaana kokamati ile okakadona ke na oku li humbata,” ta ti.

Okwa pula ovadali opo va twikile okuhonga ounona vavo kombinga yefimano lomufyuululwakalo.

Okwa ti efiku olo otaku ka landifwa oikulya yoshiwambo yomaludi a yooloka.

*-fhamalwa@nepc.com.na *

The post Unam taka kala nomafiyafano oidano yopamufyuululwakalo appeared first on New Era.