Namibia a talele po Cassinga

Osheendo sha li sha kwatelwa komeho koominista gwelongo, oonkulunkedhi, uunongononi, aagundjuka nomaudhano osho wo minista gwomatanga gegameno niikumungu yoonakulwa aakulu osha li sha talele po omahala gondjokonona yiita yemanguluko lyaNamibia moCassinga, mondoolopa yedhina Jamba, moshitopolwa shaHuila moAngola.

Minista gwelongo meme Sanet Steenkamp naminista gwomatanga gegameno tate Frans Kapofi oya talele po omahala gamwe mpoka pwa fumvikwa aakwashigwana yaNamibia pethimbo lyiita yekondjelomanguluko moAngola.

Osheendo osha li sha taambwa ko kuminista gwegameno gwaAngola omusimanekwa Lucio Amaral osho wo aanambelewa yamwe aakuluntu yepangelo.

Momasiku 21 gaSepetemba osheendo osha talele po ombelewa yaGavena gwaHuila omusamane Nuno Mahapi moLubango, omanga inaya tsikila olweendo sigo okomawendo gomapendafule gaNamibia koLuyovo.

Aanambelewa oya tula ko oongala dhesimaneko lyoonakusa komawendo.

Nolweendo lwesiku olwa hulo netalelo po lyosikola yaanona yedhina Peter Nanyemba ndjoka ya li ya tungwa po kepangelo lyaNamibia momumvo 2009. Oko tuu nkoka oominista Kapofi naSteenkamp oya gandja ko omagano gookombiuta, ooprinda, nomashina gokuninga ookopi.

Methano: Minista gwelongo Sanet Seenkamp ta kundwa kaanasikola yosikola Peter Nanyemba moAngola.