Oshipangelo shaNgela sha mona omatalashe ape

**Taimi Haihambo **

Oshipangelo shaNgela m o s h i t u k u l w a shaHangwena osha mona omatalashe ape oo a teelelwa okukwafa ovanaudu ovo va ninga efimbo veli momhumbwe yomatalashe.

Elunduluko eli ola shikula etalele po laNgoloneya woshitukula shaHangwena Kadiva Hamutumwa eshi a li a talela po oshipangelo a tale nghee onghalo tai li nyenge osho yo omashongo oo oshipangelo ha shi kala sha taalela efiku nefiku.

Metalele po laye, Ngoloneya okwa hangele oomeme veli momateelelo va nangala keembete dihe na omatalashe, nova li va tulwa monduda ashike yopokafimbo manga osaala yavo tai pu okulongwa.

Mokushakeneka oinima ei, Hamutumwa okwa fiya a lombelwa ovakulunhu voshipangelo kutya nava endelele po oshikumhungu eshi shaashi kape na omunaudu a pumbwa okukala eli monghalo yoludi eli a hangele koshipangelo.

Omukulunhu woshipangelo Dr Lukas Nghaamwa okwa yelifa kutya oshipangelo osha kendabala okulanda omatalashe a fika po200.

Pomwaalu o u opwa wedwa omatalashe a fika po150 oo ali a yandjwa omaano koshipangelo okudilila kehangano loSanlam.

“Omatalashe oo twa pewa omaano kehangano loSanlam okwa li twe a pungulila okulongifwa koshikonga shomesho osho twa teelela. Ashike omolwa omhumbwe, omatalashe otwe a kufa mo opo a kwafe shaashi otu na omhumbwe,” Nghaamwa ta holola ngaho.

Omukulunhu woshipangelo kwa twikila kutya oomeme veli momateelelo ova pewa omatalashe avo nova shuna mosaala yavo oyo opo ya pu okutunga.

Okwa twikila kutya omatalashe e li o 200 aa taa popiwa oku li mondjila natango inaa fika moshipangelo, ashike okwa landwa nale nongeenge okwa fiki otaa ka topolelwa eesaala adishe moshipangelo.

Ngoloneya woshitukulwa shaHangwena eshi a talela pooshipangelo shaNgela okwa hangele yo ku na omhumbwe yomiti.

Otaku hokololwa omhumbwe yomiti moshipangelo shaNgela hai etwa shaashi oshipangelo ohashi yakula onduba yovanaudu okudja poushiindalongo hano Ovaangola keshe efiku.

Oshipangelo natango osha li yo sha ninga efimbo shi na omhumbwe yomiti osho yo eengumi dokulongifa momilele osho ovakalimo vahapu vali inava hafela.

Nande ongaho, epangelo ola ka pondola okulanda eecondoma da wana osho yo omiti ndele ta li tukulile oitukulwa aishe moshilongo.

Nghaamwa okwa ti oinima ihapu ei Ngoloneya ali a hanga ihe li nawa paife oya tulwa peenhele.

Okwa ti omayakulo oshiwana moshipangelo shaNgela itaa shongola vali nekwafelo lovanaudu ota li pula komesho ngaashi shito.

*-taimihaihambo2000@gmail. com *

The post Oshipangelo shaNgela sha mona omatalashe ape appeared first on New Era.