Likomu zefitelela 1 296 lifumana mupendo wataku ni mulomo

Kutisa Labulalu, babeleki bamakete alimunanu bamubuso mwamutayi obona zamakete alimunanu nebakonile kupenda likomu zelikana 1 296 kwamasimu alikomu alikana 25 mwasilalanda sesitaselizwe ki butuku bwataku ni mulomo saKarasburg, mwasikiliti sa//Kharas.

Mupendo osaketi mwasikiliti sa//Kharas nokalile la17 Yenda, mi mungendenge wapili ulela kupenda likomu zelikana 13 000 kwamasimu alikomu mwasilalanda kaufela mokunani butuku saKarasburg. Hanafa piho yaviki ni viki hala mayemo abutuku bwataku ni mulomo, sibuabui walikolo lanjimo Romeo Muyunda naize likomu zesiyezi likafelelezwa kupendwa mwaliviki zepeli zetatama.

“Mungendenge undongwama masimu kaufela kamba milaka kaufela yefumaneha mbowela wamikwakwa yaB3 ni C10 kuliba Ai-Ais. Kuyemela palo yalikwata ze29 zependa zeabilwe kupenda likomu zelikana 13 000.

Mupendo usiyala taba yabutokwa mwakutibela butuku bwataku ni mulomo. Katengo kaLifasi kakabona zamakete aLimunanu, kalemuha kuli mupendo ki yona nzila yakufukuza ni kulwanisa butuku. Mupendo ulela kufukuza kuambalakana kwabutuku, kufukuza likomu kufumana butuku ni kubukeleza milaka,” nekubulezi Muyunda.

Natolokile kuli kungelela cwalo nikuhanisa kuzamaya kwalikomu, kunyakisisa, kutatuba ni likezo zeñwi zamakete, mupendo ubapala kalulotuna mwakukwalela kuzuha kwabutuku nikubukeleza makete alimunanu, maino abupilo ni kalulo yasifumu salimunanu.

“Balimi balikomu baelezwa kuswalisana ni babeleki bababona zamakete alimunanu kubona kuli likomu kaufela zeswanelwa kupendwa zapendiwa. Kupalelwa kulatelela taelo yeo ikaba kutula mulao ohatisizwe,” nabulezi.

**Mayemo abutuku bwataku ni mulomo mwaZambezi **

Butuku bwataku ni mulomo nebunyatezwi kwasioli saKalala mwasikiliti saZambezi la6 Yenda 2026. Kualabela, mutayi obona zamakete alimunanu mwasikiliti saZambezi ukalile mupendo, kunyakisisa nikuhanisa kuzamaisa likomu kulika kutibela kuambalakana kwabutuku. Kutisa Labulalu likomu zelikana 42 286 kwalipango ze34 nelipendilwe kwalibaka zetaselizwe nizeili bukaufi.

Hakuna lipiho zenca zabutuku bwataku ni mulomo zefumanwi kuzwelela piho yapili haipatalazwa. Miseco kwaLuhonono ni Nakabolelwa itomilwe mi izamaiswa kaswalisano yababeleki bababona zamakete alimunanu ni mapokola banaha Namibia kubona kuli hakuna likomu zezamaya.

“Balimi , baluwi balikomu ni sicaba baelezwa kuswalisana ni babeleki bababona zamakete alimunanu kuamana ni milao yetomilwe, nikubiha lipiho kaufela zekulubelwa, kuzamaisa likomu kokusika lumelelwa, nama ni zeñwi zepangiwa fanama kwaofesi yebona zamakete alimunanu yeili bukaufi. Likolo lizwelapili kunyakisisa, kupenda ni kutibela kuambalakana kwabutuku,” nekubulezi Muyunda.

[email protected]

The post Likomu zefitelela 1 296 lifumana mupendo wataku ni mulomo appeared first on New Era.