Ngoloneya woshitukulwa shaShana Hofni Iipinge okwa yelifila ovakalimo vomoshitukulwa shaShana nghene teshi endifa naashi a dula okuningila ovakalimo vomoshitukulwa shaShana moule wefimbo olo a kala mombelewa.

Iipinge okwa denga omufindo keeproyeka dihapu, odo dimwe di li da pwa, dimwe odi li metifa nadikwao oda patululila ovanyasha eemhito doilonga do dimwe oda eta exumokomesho noimbuluma.

Eemhito doilonga

Iipinge okwa ti eeproyeka edi tadi dana onghandangala moshitukulwa moku yandja eemhito doilonga omo mwa kwatelwa yo eeministeli nomalelo eedoolopa oda dula oku yandja eemhito doilonga kovakalimo va fika po 1 801.

“Elelo doolopa laShakati ola dula oku yandja eemhito doilonga tai kalele kovanhu veli 120 omanga eemhito doilonga yopokafimbo okovanhu veli 1 681 oda yandjwa komalelo eedolopa akwao ngaashi Ongwediva, Oshakati osho yo eeministeli odo dili moshitukulwa,” ta ti.

Oimbuluma

Iipinge okwa twikila kutya oimbuluma moshitukulwa oya shuna pedu neepelesenda 13. Ngoloneya okwa ti oimbuluma momukokomo wodula 2024/25 oya li po 11 804 mo 2025/26 oili po 10 267.

Oimbuluma yomahepeko oomeme nounona okwa ti oya shuna pedu neepelesenda 12.

Ouhaku

Koshikondo shouhaku Iipinge okwa ti oshitukulwa osha mana okutunga okapangelo kanini kaMpundja noke li ta ka yandje omakwafo koshiwana nale.

“Oshitukulwa oshe li pyakidila natango newapaleko lokapangelo kashona kEheke ka kale yo ke li pondodo ili nawa,” ta ti.

Iipinge okwa twikila kutya moshipangelo shaShakati oICU nayo oili nale pokupwa. OICU oyo hai tambulilwa ovanhu ava veli monghalo idjuu neenghono. Okwa ti oyi li ashike koWindhoek. Okwa ti ngeenge oya pu nena otashi ka konda ovanhu vahapu omaulu. “Omalongekido oku tameka oku tunga oshipangelo shaNdangwa nao otwe a etamo, Iipinge ta holola.

Okwa weda po kutya elalakano oku kufa oshipangelo shaShakati noshaNandjokwe omukundu umwe.

Ehongo

Ngoloneya okwa ti ehongo oli li oshiima shakula noshinakuwanifa shakula kuvo onga elelo li kale la kalelwa po nawa.

“Neudo oshitukulwa osha longifa eemiliona N$32 odo da longifwa oinima ihapu ya nyama koshikondo shehongo,” ta ti.

Kehongo Iipinge okwa ti ova weda eefikola dihapu omaboloka noku a wapaleka osho yo okupewa oikwafifohongo ya yoolola.

Eefikola edi da kwafa ongaashi Onaushe, Erundu, Iihenda, Omaalala, osho yo Ontinda.

Omatungo

Iipinge okwa ti ova kendabala oku tunga omatungo ahapu a yooloka oo haa longo oilonga ya fimana ngaashi etungo lo Ombudsman, okamba yovakwaita mOshakati nodolongo yaLuno mOndangwa oyo ya kosha eemiliona da konda po N$33.

Omalelo eedolopa moshitukulwa natango okwa tunga noku longolola eepate meedoolopa ngaashi Ondangwa, Oshakati osho yo Ongwediva.

Eemhito dokulihonga

Iipinge okwa ti natango ehangano lo Social Security ola longifa eemiliona N$ 5 moku yandja eemhito kovanafikola vokoiputudilo yopombada opo va dule okuningila omadeulo avo.

Oshikukuta

“Omaumbo a koya po 21 659 okwa pewa oshikukuta opo a dule oku li kwafa apa taa dulu, Ngoloneya ta yelifa.

Omalukalwa

Ovakalimo moshitukulwa o 1 177 ova pewa eenhele dokutunga omalukalwa avo. Ombelwa yangoloneya natango oya yandja oitungifi yomalukalwa kovakalimo va yooloka moshitukulwa. Oshitukulwa natango mekwatafano nehangano lo NHE onghee ngaho tashi twikile noku tungila ovakwashiwana omalukalwa.

-taimihaihambo2000@gmail.com

The post Eeproyeka ota di yambula po Oshana appeared first on New Era.