Omapopya a nafangwa – Amupanda

Omuleli wongudu yoAffirmative Repositioning (AR) noku li oshilyo shopaliamente Job Amupanda, oo a kala ta kondjifa omufinda utilyana u hanaunwe po, okwa ti eyambidido lOngongahangano yOukumwe waEuropa i shiivike nawa nedina European Union (EU) lovanafaalama vokonooli yoshilongo kali na eshi tali ti ngee kapu na sha shi liwetikile shoku va pa omhito va kufe ombinga moipindi yombelela paunyuni.

“Ne tu lombwele kutya onaini ovanafaalama ovo ve li konooli yomufinda utilyana tava tameke okukufa ombinga moipindi.

Oo omapopyo ashike a nafangwa. Kae na eshi taa ti nandenande,” osho a ti ngaho.

Amupanda okwa ti ita kondjifa omilandu tadi lalakanene okukelela omikifi, ashike ota ti nadi landulwe shi fike pamwe ngee kwa monika omukifi.

Omukifi wekondo nelaka oo wa tukuluka moKarasburg owa holola kutya koumbuwanhu womufinda utilyana nako otaku dulu okuholoka omikifi, osho a ti ngaho.

Omuleli wongudu yoAR okwa ti omukifi ou wa holoka monhele oyo kwa li ya talika kutya kai na omikifi nau fininike epangelo li talulule oshikondo shokulandifa oimuna shoshilongo nepatelo kondje lovanafaalama vokomikunda koonoli yoshilongo.

Ehangano lOpaunyuni lOundjolowele wOinamwenyo omwedi wa dja ko ola shiivifa kutya ombinga yoshilongo oyo kwa li hai landifa ombelela kondje yoshilongo nayo itai dulu vali okulandifa shaashi oya monika omukifi wekondo nelaka.

“Ngee onhele i na omukifi, paife ombelela ei tai di konhele yaamenwa [konooli yomufinda utilya] ohatu i ifana shike?” Amupanda ta pula.

Okwa ti omufinda utilyana einda lopaliko la ngabeka eemhito dongeshefa dovanafaalama ovo ve li konooli yodalate ei.

“Odalate yomufinda utilyana einda lopaliko leepelesenda o60 dOvanamibia.

Otu na okukonga omikalo dimwe doipindi,” osho a ti ngaho.

Amupanda natango okwa pula oimaliwa i yandjwe kovanafaalama oshilongo ashishe va dule okulwifa omukifi wekondo nelaka.

“Oimaliwa yomukifi wekondo nelaka itai dulu ashike okukala yokoumbuwanhu. Nai kale yoshilongo ashishe,” osho a ti ngaho.

‘EENDADO INADI LONDA’

Presidente Netumbo Nandi-Ndaitwah Omaandaxa okwa londwela eengeshefa diha wedele eendado dombelela, oikwanoipangifo ya fimana noilongifo aishe yopaulumomumbwe pefimbo lomukifi ou.

“Omukifi ou inau ninga etomeno lokuwedela eendado,” osho a ti ngaho.

Nandi-Ndaitwah natango okwa shiivifa yo eenghatu odo epangelo tali kufa li dule okulwifa omukifi ou nokwa tambula ko kutya owa fiya ovanhu vahapu monghalo idjuu yoshimaliwa unene ngaa ovanafaalama novanailonga vomeefaalama.

YA PATA

Omunailonga mongeshefa yokulandifa ombelela mOvenduka yedina Ouma Nora Butchery, Suzane Scheepers okwa ti ongeshefa oya xulifa po ofandifa yowina oshivike sha dja ko shaashi kapu na ombelela ya wana i dule okutwikila neefandifa dayo dowina.

“Itatu shiivifa sha, shaashi katu na ombelela ya wana,” osho a ti ngaho.

Scheepers okwa ti ongeshefa oya teelela omangabeko omalandifo a dje po opo okulandifa ombelela yodi kutameke.

Omulandifi wombelela umwe, a popya noThe Namibian ashike okwa pula aha tumbulwe kedina, okwa ti ongeshefa yaye oya pata manga pokafimbo shaashi ke na apa ta hange ombelela.

“Oko handi lande ombelela ovanhu otava popi manga novanambelewa voinamwenyo opo ve uye va konakone oinamwenyo i dule okutomwa nawa. Ovanambelewa otave va lombwele kutya itava dulu okutoma manga,” osho a ti ngaho.

Okwa ti ongeshefa ohai landifa ombelela i talala ashike ihai kala nombelela ihapu meefilindja.

“Katu na sha shokulandifa mofilindja yetu, otwe lineekela ohatu ka dula okutoma,” osho a ti ngaho

The post Omapopya a nafangwa – Amupanda appeared first on The Namibian.