NNN a tumbaleka Mwanyangapo

Omupresidente Netumbo Nandi-Ndaitwah okwa tanga Lameck Mwanyangapo ou a li omunailonga mukulu waNBC ta ti okwa li omulumenhu a longo nondjungu ngeenge ta faneka nokuhole oilonga yaye.

Okwa xulifa mepupi lomido 61, oshivike sha dja ko moWindhoek.

Mwanyangapo okwa xulifa konima eshi a monika omukifi wokaangela.

Mwanyangapo okwa longela NBC efimbo lile, nokwatumbalekwa koshiwana molwoilonga yaye iwa osho yo okulonga nondjungu.

Okwa kala a longo onga omufaneki, omo a kala e na owino yokufaneka osho yo okukwata eedivo doTV.

Mwanyangapo okwa longa nokufaneka okudja omudo Omukokolipresidente Sam Nujoma a li koshipundi omo a dana onghandangala ya kula okulonga meni nokondje yoshilongo.

Okwa fiya po ounona vaye vane osho yo omukulukadi waye. Okwa monika omukifi wokaanela omudo 2023, omo kwa li a tambulilwa koshipangelo koSouth Africa.

Ota fudikwa Olomakaya keumbo laye moshitukulwa shaMusati.

Pefimbo Mwanyangapo a monika omukifi wokaangela, okwa tota po ehangano lovanhu va kwatwa kokaangela

Okwa kala ekwetele ehangano e li komesho ta yandje ehongo nokutwa ovanhu ve li kepango lokaangela omukumo. Omupresidente oshivike dja okwa talela po eumbo laMwanyangapo moWindhoek okufikifa etumwalaka nomahekeleko.

Okwa ti ota dimbuluka Mwanyangapo pefimbo kwa li a faneke oudivo hava dana keenghundana koTV, omo kwa li a faneke oudivo ya yela nawa.

“Omulumenhu ou okwa fiya po oshihopaenwa shiwa sha pumbwa okulandulwa,” ta ti.

Olutu laMwanyangapo ola fika kokapale keedila kaNdangwa Etitano. Okwa li la shakenekwa kovanailonga voNBC va dja mOshakati.

Ovanailonga pamwe naye moNBC, ova hokolola tava ti Mwanyangapo okwa li omulumenhu omunambili, ena oukumwe nelandulafano. Omunashipundi welelowiliki laNBC, Lazarus Jacob okwa tanga Manyangapo ta ti okwa li omulumenhu a longo oilonga nondjungu.

“Mwanyangapo okwa li omulumenhu e na oukumwe, alushe tayolo navakwao koilonga,” ta ti.

Okwa ti ehangano loNBC ola pandula oilonga iwa ya longwa kuMwanyangapo osho yo eshi a kala ta ulike oshihopaenenwa shiwa moshiwana.

–fhamalwa@nepc.com.na

The post NNN a tumbaleka Mwanyangapo appeared first on New Era.