Mucaaradka iyo Villa Somalia oo loogu baaqay in ay gaaraan xal deg deg ah.

Bulshada Rayidka Soomaaliyeed ayaa Dowladda Federaalka Soomaaliya iyo Mucaaradka ugu baaqday inay dib ugu laabtaan miiska wadahadalka, isla markaana ay ka tanaasulaan qodobbada iyo mowqifyada sii hurinaya khilaafka siyaasadeed ee dalka.

Warsaxaafadeed kasoo baxay dalladda SONSA ayaa lagu sheegay in xal waara lagu gaari karo oo keliya wadahadal, isu-tanaasul iyo in dhinacyadu si furan uga wada hadlaan arrimaha ay isku hayaan. Bulshada Rayidka ayaa sidoo kale taageertay hannaan kasta oo looga hortagi karo xasilooni-darro siyaasadeed iyo xiisado hor leh.

SONSA waxay sheegtay in sii socoshada khilaafka siyaasadeed ay keeni karto caqabado hor leh oo saameeya amniga, dowladnimada iyo kalsoonida dhinacyada siyaasadda, iyadoo sidoo kale ka digtay in xaaladda noocaas ah ay abuuri karto fursado ay faragelin shisheeye kaga dhex dhacdo arrimaha gudaha dalka.

Baaqa ayaa si gaar ah diiradda loogu saaray arrimaha doorashooyinka dalka, kuwaas oo ay Dowladda Federaalka iyo Mucaaradku isku khilaafsan yihiin hannaanka loo marayo iyo qaabka lagu gaari karo doorasho ay dhinacyadu isku raacsan yihiin. Bulshada Rayidka ayaa ku boorrisay dhinacyada inay mudnaanta siiyaan wada-hadallada ku saabsan doorashada, isla markaana ay raadiyaan hannaan loo dhan yahay oo lagu xallin karo khilaafaadka jira.

Dalladda ayaa sidoo kale ku adkaysatay in aan la iska indhatirin aragtiyada kala duwan ee dhinacyada siyaasadda, balse loo baahan yahay in la abuuro jawi ay dhammaan dhinacyadu si nabad ah ugu soo bandhigi karaan mowqifyadooda. Waxay sheegtay in heshiis siyaasadeed oo loo dhan yahay uu muhiim u yahay xasilloonida dalka iyo in laga fogaado in khilaafaadka siyaasadeed ay isu beddelaan xiisado amni.

Baaqa SONSA ayaa kusoo aadaya xilli Dowladda Federaalka iyo qaar ka mid ah siyaasiyiinta mucaaradka ay weli ku kala aragti duwan yihiin qaabka loo wajahayo doorashooyinka soo socda, iyadoo dhinacyadu ay soo bandhigeen mowqifyo kala duwan oo ku saabsan hannaanka doorashada iyo sidii loo gaari lahaa is-afgarad siyaasadeed.