Uuthano momapandaanda wa hwepopaleke iimbuluma mOshana

Victoria Immanuel

Aakalimo molukanda Uupindi mOshakati oya ti oya pandula opolisi moshitopolwa shaShana sho ya tula uuthano momapandaanda okulwitha iimbuluma.

Omunangeshefa gumwe ena ongeshefa yomanwiino mOshakati okwa ti, oshigwana okwa li hashi kala tashi lili tashi kuthwa oongodhi niinima yawo okuza pehala lye, ihe nkene uuthano wa tulwa po aafuthi ihaya yugu we aantu momapandaanda.

“Otandi pandula oshoka onkalo ndyoka a ngala yetu kanithila ookasitoma ihe nena oya manguluka. Ookasitoma ka kwali haya vulu okweenda koompadhi, ihe nena oya manguluka,” ta ti ngaaka.

Opolisi oya ti, uuthano mboka owa tulilwa mo okulwitha iimbuluma opo ku monika kutya olye taya longo iilonga inaayu uka, yo vulwe okumangwa.

“Ngele pe na okathano uuyelele awihe ohau ulikwa kethano, shi vulithe okufekelwa,” ya yelitha ngaaka.

Aakalimo pamwe nopolisi moshitopolwa shaShana oya taalela omaupyakandhi giimbuluma, mbyoka tayi ende tayi indjipala, noya pimbila ethimbo ndika lyuuka kehulilo lyomumvo.

Opolisi oya ti iimbuluma oya indjipala, aafuthi otaya longitha ompito kehe okuyuga aakwashigwana iimaliwa yawo, iihauto osho wo okuteya omagumbo.

“Ethimbo ndika lyuuka kehuulilo lyomumvo ookalyamupombo otaya longo ya itula mo onkene oshigwana ina shi pumbwa okukala sha kotha tashi mbonyoka. Otwa kala nokupopya iiningwanima tayi longwa kaafuthi miikundaneki ya yooloka osho wo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” ya ti ngaaka. Opolisi yaShana otayi kumagidha oshigwana shi longele kumwe nayo okumanga aafuthi mboka osho wo okulopota mbala una sha mono iilonga yili ngaaka tayi holoka.

Tayi ti aantu mboka oya pumbwa okumangwa opo ya ze mo mokati koshigwana.

–vkaapanda@nepc.com.na

The post Uuthano momapandaanda wa hwepopaleke iimbuluma mOshana appeared first on New Era.