Soomaaliya iyo Jabuuti oo heshiis ku kala saxiixday xoojinta iskaashiga baarlamaanada

Soomaaliya iyo Jabuuti ayaa magaalada Jabuuti ku kala saxiixday heshiis is-afgarad oo lagu xoojinayo iskaashiga iyo wada-shaqeynta labada baarlamaan.

Heshiiska waxaa dhinaca Soomaaliya u saxiixay Guddoomiyaha Golaha Shacabka ee Baarlamaanka Federaalka Soomaaliya, halka dhinaca Jabuuti uu u saxiixay Guddoomiyaha Golaha Qaranka, Dileita Maxamed Dileita.

Heshiisku wuxuu diiradda saaraya is-weydaarsiga khibradaha, tayeynta habraacyada sharci-dejinta iyo horumarinta awoodda shaqaalaha baarlamaanka labada dal.

Sidoo kale, labada baarlamaan ayaa ku heshiiyey inay iska kaashadaan tababarrada, cilmi-baarista sharciga, casriyeynta hababka shaqada, adeegsiga teknoolojiyadda casriga ah iyo sugidda amniga xogta.

Heshiiska ayaa sidoo kale dhigaya in la xoojiyo wada-shaqeynta guddiyada joogtada ah iyo in la sameeyo kooxo saaxiibtinimo oo isku xira baarlamaanada Soomaaliya iyo Jabuuti.

Labada dhinac ayaa intaas dheer ku heshiiyey inay isku dubbaridaan mowqifyadooda ku aaddan arrimaha lagu gorfeeyo madalaha baarlamaaniga ah ee heer gobol iyo heer caalami.

Guddoomiyaha Golaha Qaranka Jabuuti, Dileita Maxamed Dileita, ayaa soo dhoweeyey natiijada wada-hadallada labada dhinac, isaga oo sheegay in is-weydaarsiga aragtiyaha iyo khibraduhu ay horseedeen natiijooyin wanaagsan.

Dhankiisa, Guddoomiyaha Golaha Shacabka Soomaaliya ayaa sheegay in Soomaaliya ay ka go’an tahay xoojinta xiriirka baarlamaaniga ah ee Jabuuti, gaar ahaan dhinacyada is-weydaarsiga khibradaha iyo iskaashiga hay’adaha sharci-dejinta.

Heshiiskan ayaa qayb ka ah dadaallada labada dal ay ku doonayaan inay ku ballaariyaan iskaashiga labada dhinac iyo xiriirka ka dhexeeya hay’adaha dowladda Soomaaliya iyo Jabuuti.