OSHAKATI- Ovakwashiwana vomolukanda Oshikango li li kOshakati East ova ninga oihakanwa yokulikwafela momaendo ngeenge oushitwe tau pula molwaashi kave na sha oundjuwo wokulongifa.

Onghela Kundana okwa talela po olukanda e li noku ya meenghundafana novakwashiwna.

Ovakwashiwana ova holola tava ti oshi li ova taalela omhumbwe youndjuwo naashi osha eta opo va kale tave li kwafela momaendo. Ngeenge owai momaendo omwa nyata neenghono eshi ovanhu va nyateka mo.

Omuutolinghundana ou okwa mona omhito yoku ya momaendo ashike ka kwa li shipu okuenda mo shaashi omuhadi unene eenyata dovanhu eshi ve li kwafelela mo.

Ovakalimo ova dengela eebashu davo di li popepi nomaendo ongelaka yaElcin.

Ova hokolola tava ti polukanda opo ova kala po okudja omudo 2015.

Dumingus Elia okwa hokolola ta ti polukanda lavo ope na ashike okandjuwo kamwe kopaumwene ka tulwa po kumwene wako ashike oha ka patwa nekumba.

“Ita dulu okuwanifa oshimaliwa shokulonga oundjuwo shaashi otuna eendjambi di li pedu. Oshi li eshongo linene twa taalela,” ta ti. Okwa ti ovanhu vamwe ohave ke li kwafela moshana popepi ashike lolukanda lavo.

“Ngeenge owai poshana kuna a pa topiti shaashi keshe pamwe opanyata eshi twe li kwafela.

Ka tuna nghene tuna okuninga shaashi kape na sha oundjuwo,” ta ti.

Lonia Hafeni okwa hokola ta ti omaendo okwa tulwa oitenda yoluumbo ashike kemanya ku dja ondwi shaashi ovanhu ohava londo koitenda ndele tave ke shi mana.

“Oshi li eshongo linene ku fye ovakainhu shaashi ngeenge omunhu owa hala okulikwafela oha shi tu pula opo tuye moshana efimbo loufiku ile tu ka londe koitenda yoluumbo lomaendo ndele hatu shi mana,” ta ti. Okwa ti natango ove li moudjuu unene shaashi moshana omo have ke li kwafela omuna omeva a talama a dja mocanala ashike okwa nyata paife shaashi ohave li kwafele popepi nomukangha oo womeva. “Ovanhu vamwe omo hava teke omeva momukangha omo shaashi polukanda letu Kape na sha opomba yomeva,” ta ti.

Okwa weda po ta ti ovanhu vamwe ohava teke mocanala omanga vamwe ohava teke kopamba i li kolukand Uupindi hai futwa N$100 keshe komwedi. Risto Simon, okwa hokolola ta ti ye okwa tunga okandjuwo kaye ashike ka ke li pamufika woshinanena.

Simon okwa ti unene tuu efimbo longula ngeenge tai koilonga oha mono ovanhu tava londo koitenda yoluumbo lomaendo va uka mo ve ke li kwafela. “Ngeenge onda mono omunhu ohandi mu kelele ndele handi mu hanyenye shaashi itashi ulike efano liwa ngeenge ovanhu tava nyateka omaendo muna ovakwapata vetu tava tulumukwa,” ta ti.

Okwa ti oshiwana nashi fimaneke onhele yomaendo shaashi omaendo onhele yeumbo lovanhu ovo va tetekela.

Simon okwa ti natango ova taalelaeshongo lokuhe na omalamba shaashi molukanda lavo omwadima efimbo keshe osho shi li tashi nena eembudi oufiku.

Okwa koleka ta ti ponhele opo ova ya po vehe na epitikilo okudja kelelo lodoolopa yaShakati molwaashi navo ova pumbwa onhele yomalukalwa avo.

Eshi a kwatafana naKundana, Mayola wodoolopa yaShakati Leonard Hango okwa yelifa ta ti oshi li oshinakuwanifa sheumbo keshe li kale la tula po okandjuwo.

“Ovakalimo ve li polukanda opo ove li kufila edu ina va pewa epitikilo kumuni. Osha puka oku li kufila edu pamukalo woumbudi,” ta ti. Okwa weda po ta ti ngeenge ovanhu ova tembulwa kumuni ohava dulu otungilwa ounduwo ashike ngeenge omunhu okwa ya ponhele ina pewa epitikilo nena ota tula po omayakulo aye mwene.

Okwa yelifa ta ti muni ota ka talela po olukanda olo ndele ta popi novakalimo kombinga yomashongo oo va taalela nokufatulula omilandu da muni.

-fhamalwa@nepc.com.na

The post Tava longifa omaendo ongoundjuwo mOshakati …vamwe vati ohava i moshana appeared first on New Era.