Iran: “Waxaan si buuxda ugu diyaar-garownay in dagaalku dib u billowdo”

Wasiirka Arrimaha Dibadda Iran, Abbas Araghchi, ayaa sheegay in dalkiisu si buuxda ugu diyaar-garoobay suurtagalnimada in dagaalka dib u billowdo, isagoo ku hanjabay in Tehran ay si adag uga hortagi doonto weerar kasta oo cusub.

Araghchi oo wareysi siiyay telefishinka NBC ayaa sheegay in Iran ay diyaar u tahay inay iska caabbiso “gardarro kasta oo cusub”, xitaa haddii xaaladdu isu beddesho waxa uu ku tilmaamay “dagaal aad u ba’an”. Wuxuu sheegay in Iran ay casharro ka baratay dagaalladii hore, isla markaana ay wax ka beddeshay xeeladaheeda.

Wasiirka ayaa sidoo kale sheegay in Iran aysan albaabka ka xirin diblomaasiyadda, isagoo carrabka ku adkeeyay in go’aanka waddada la qaadayo uu hadda ku xiran yahay Madaxweynaha Mareykanka, Donald Trump.

“Waxaan si buuxda ugu diyaar-garoownay in dagaalku dib u billowdo, waxaana si adag uga hortagi doonnaa gardarro kasta oo cusub. Isla waqtigaasna, waxaan diyaar u nahay diblomaasiyadda,” ayuu yiri Araghchi.

Araghchi wuxuu sheegay in dagaalladii hore ay la socdeen dadaallo wada-hadal ah, balse uu Mareykanku weerarro qaaday xilli ay socdeen wada-xaajoodyo. Sida uu sheegay, Iran waxay 2025 iyo Febraayo 2026 aqbashay wada-hadallo ay Mareykanku soo jeediyeen, balse labada jeerba, ayuu ku eedeeyay Washington, weerarro ayaa dhacay xilli wada-hadalladu socdeen.

Dhanka kale, Araghchi wuxuu sheegay in Tehran ay weli dooneyso in la raaco waddada diblomaasiyadda, iyadoo Iran ay dhawaan soo bandhigtay qorshe toddoba maalmood ah oo la xiriira dib u furista marin-biyoodka muhiimka ah ee Hormuz, iyadoo dalbanaysa in Mareykanku joojiyo colaadda, sii daayo hantida Iran ee la xannibay, isla markaana loo oggolaado iibka shidaalka Iran.

Hadalkan ayaa ku soo beegmaya xilli xiisadda u dhexeysa Iran iyo Mareykanka ay weli sarreyso, iyadoo dhinacyadu ay isku khilaafsan yihiin shuruudaha lagu gaari karo heshiis cusub, halka dadaallo diblomaasiyadeed oo ay wadaan dhexdhexaadiyayaal ay socdaan. Madaxweyne Trump ayaa sheegay inuu filayo in wada-hadallo dheeraad ah lala yeesho Iran toddobaadkan.