Eengalo da Deckzen Goshikoto tadi denge po oudja

**Hambeleleni Daniel **

Omushikingalo Iithete Timoteus a shiviika nawa nedina lokembako Deckzen Goshikoto okwa ti eengalo daye oda nhuninwa okuetela oshiwana ehafo opo shi kale shina ohokwe yokupwilikina eengalo.

Omunyasha ou e li omukalimo womOshakati moshitukulwa shaShana ota kufa ovanhu vahapu koipundi mokushika eengalo.

Deckzen okwa ti okwa tameka okushika eengalo omudo 2017.

Okwa ti natango oku li omwiimbi mongundulwiimbo mongeleka yavo osho yo okukufa ombinga moinyangandalwa yo SCM yovanyasha.

Okwa ti oku li omulihongi teli longele outolinghundana koshiputundilo shaTriumphant College mOngwediva.

Okwa yelifa ta ti ofikola itai mu imbi aye komesho noshitalendi shaye.

“Ondi hole okuimba. Ohandi shi ningi okudja komutima wange shaashi osha fimana ngeenge handi longifa ounongo wange,” ta ti.

Okwa holola ngaho kutya okukala omulihongi osho yo omushikingalo kashipu shaashi fimbo limwe oku na okufiya po oilonga yaye yofikola opo a ka shike eengalo.

“Ondi na omukumo kutya ohandi mane elihongo lange shaashi okukala omushingingalo itashi ti kutya omunhu ita dulu okupita oilongwa yaye,” Deckzen ta ti.

Okwa ti oha imbi oungalo konyala vomaludi aeshe ngaashi Amapiano, eekwaito, nomaimbilo opamhepo.

Okwa ti oshitalendi shokuimba okwa kufa oshiholelwa eshi kuxe shaashi manga okwa li mushona xe okwa li e hole okuya naye kongeleka keengudulwiimbo.

Naashi, okwa ti oshe mu twa omukumo ndele ta landula naana eshi a tekulwa kuxe kutya osha fimana ngeenge omunhu ta longifa unongo.

Okwa ti mokushika eengalo oshe mu longa shihapu ngaashi okulonga noudiinini nokukala elinekela muye mwene.

Okwa ti okangalo kaye kamwe oko ashika po kawa ota ka ti Efenge.

Okangalo o ke na etumwalaka la uka movanhu ovo ve hole okupopya vakwao.

“Hano sha hala kutya efange ndi ye komesho ndi ka longe noudinini,” ta ti.

Deckzen okwa holola kutya oshimaliwa osho shimwe shili eshongo lakula ngeenge tashi ya kovashikingalo vanini.

Okwa ti ohava longo noudjuu opo va kale va futa eestudio va ningile mo eengalo davo nouvidio.

Okwa pula epangelo li kale ta li yambidida ovashikingalo vopedu molwaashi eshi otashi kwafele va xume komesho okulongifa ounongo wavo.

*[email protected] *

The post Eengalo da Deckzen Goshikoto tadi denge po oudja appeared first on New Era.