Erongob ǂurusib !âb ge ǁanǂgāsabena ra ǂgan in ǂgan!gâsasib !nâ ra !gam -ǁōn !aroma !âisen

< Linekela Halwoodi

Ministeris ǂUrusib tsî ǀHûhâsi !Oabadi dis di Erongo ǀkharib !âbge ǁîb ǁanǂgāsabena ge ǂgan, in ǂgan!gâsasib !nâ ra khoen ûiga ū ǁōn, aiǁgause ǀgapiǀaos tsî suguri-i !aroma !nākorobe !âisende dī. Nē ǂgans ge Hoa !Hūbaisi ǀAe-aon !Norasasib Tsēs 2026 dis ǁaxasib hîa ge 17 Taraǁkhumuǁkhâb 2026 dis ai ūhe hâ is tawa ge ǂoaxa. Nē kurib di ǂgaiǂams ge “!Norasa !ûisa ǂHīguhe tama ǁŌn !aroma” ti go hâ i tsî hirihiri!nâs ǂgaiǂamsa “ !Norasa Kō!gâs Sa ûib !Aroma”.

Dr Anna Jonas, ǂUrusib Direkters Erongo ǀkharib dis, ge ge mî, khoen tā mâtin ra tsâsa xu nî mîǁguisa tare-en ǀaesen hâ !khaisa, ǀnî ǁōn khoe-e xu khoe-i ǁga ǂhīguhe taman (NCDs) hîa sâusen hâse hân ra ǀae!khōs !âidi !nâ-ū ǀgui ǁgausen amaga. “ǀGapiǀaos tsî suguriǁōs hâra ge ǂanhe tamase tsî ǀguis khami ī -gauǁgau-i tsînats mû tamase sa soros !nâ hâ ǁkhā,” tis ge Dr Jonasa mî tsî ǁanǂgāsabena gere ǂgaoǂgao!nâ in ǁnaetib ase dī tsî nē ǁōn !aroma !âisende dī.

ǀGapiǀaos tsî suguriǁōs hâra ge nē kharib !nâ ra ǁîra danasa ra !khāǂui ǁōra, Dr Jonas ra mîsa !oa. NCDn ge khoe-e xu khoe-i ǁga ǂhīguhe tama hâ tsî ǁnaetisase gaxu ǁaeb ǀae!khōs tsî kō!gâsa ǂhâba hâ. Nau aiǁgaun nē !nôa ǁōn din ge !numis, danaǀaen, kau!nās, asmas tsî !naidi ǀaeb tsîna. Jonas ra mîsa !oan ge !nāsa NCD ǁōna ǁkhaubahe ǁkhā, ai!gûsa !hâumâi tamas ka io toa kai ǁkhā sao ran !nâ-ū, !gâise ǂûs, ǁnaetisase sorosa !âisenūs, soros !gomma ǂgaoǀkhāsa ǀnōb ai ūhâs, tabaka-i tsî ǂauxûib sa sorosa ǂuruo!nâsib !nâ ǂgāna xu ūi tama mâsib !nâ ǂgā mâsiga xu ǂgōsens tsî ǀams ai ǀae1khōs !aromats ra māhe soǀôana ǁaeb ai sîsenūs hâna.

Dr Jonas ra mîsa !oas ge ǀaedī-aon mā tsi hâ soǀôana sîsenū tama isa nē ǁōsa ǀgaisase khao-oas !nâ ra ǂgā tsî ǀnîhâ -khaehe ǁoasa tamas ka io sa ûiba a ūǁkhā mâsib !nâ ra ǀam kai, aiǁgause !naira ǂkhôa tsî ǂgaob ǁūna mās khami. ǁÎs ge hoa ǀhûhâsiga ra ǂgan, ǂgurusiba aimâi tsî hâ a mario!nâ !oabade sîsenūsa.

The post Erongob ǂurusib !âb ge ǁanǂgāsabena ra ǂgan in ǂgan!gâsasib !nâ ra !gam -ǁōn !aroma !âisen appeared first on New Era.