U Burundi bwasezerewe muri CECAFA U17

Nyuma yo gutsindwa na Ethiopia y’abatarengeje imyaka 17 muri CECAFA iri kubera i Kigali ibitego 3-0, ikipe y’Igihugu y’u Burundi y’ingimbi zitarengeje iyo myaka, yasezerewe itsinzwe imikono yose n’umwenda w’ibitego 11.

Ni umukino watangiye Saa Kumi z’amanywa, ubera kuri Kigali Pelé Stadium. Abarundi bari batsinzwe umukino wa mbere muri iri tsinda rya kabiri, baje bifuza kubona amanota kugira ngo barebe ko imibare yaba myiza mu gihe Ethiopia yaje ishaka intsinzi yayo ya mbere.

Abanya-Ethiopia bawutangiye barusha u Burundi cyane, ndetse babona ibitego hakiri kare.

Iminota 45 y’igice cya mbere, yarangiye Ethiopia yatsinze u Burundi ibitego 3-0 mu mukino w’umunsi wa kabiri muri CECAFA y’Ingimbi zitarengeje imyaka 17 [2027 U17 AFCON CECAFA Qualifiers] iri kubera i Kigali.

Abanya-Ethiopia batsindiwe na Zemichael Niguse ku munota wa 10, Akrem Jemal ku munota wa 19 na Abdisa Gutema ku munota wa 44.

Mu gice cya kabiri, ingimbi z’u Burundi zaje zakosoye imikinire ndetse bibafasha kutongera kwinjizwa ibindi bitego mu gihe Ethiopia yifuzaga kongera umubare w’ibitego yari yatsinze ariko ntabwo byarikundiye.

Abarundi bakomeje gushaka uburyo bwo kwishyura ibitego ariko ntabwo ikipe bakinaga yabemereye, ndetse iminota 90 irangira Abanya-Ethiopia begukanye intsinzi y’ibitego 3-0.

Gutsindwa umukino wa kabiri kw’u Burundi, kwatumye isezererwa n’ubusa bw’amanota n’umwenda w’ibitego 11.

Undi mukino wabaye, ni uwo mu itsinda A warangiye Sudani y’Epfo itsinze Sudani ibitego 3-2 mu gihe Tanzania iri gukina na Somalia mu itsinda C.

Ingimbi z’u Burundi zasezerewe muri CECAFA y’abatarengeje imyaka 17 iri kubera i Kigali Ingimbi za Ethiopia zatsinze umukino wa mbere Ibyishimo byari byinshi ku banya-Ethiopia Zemichael Niguse [24] ubwo yari amaze gutsinda igitego cya mbere Ni umukino utoroheye u Burundi

UMUSEKE.RW