Ovanailongo va hombola Ovanamibia otava ka pewa eedjapo…okuulika kutya ohava di moNamibia

Ouministeli woikwameni, etonatelo lokeengamba neameno owa holola kutya ovakwashiwana ovo vehe shi Ovanamibia ndele ova hombola ovakwashiwana vaNamibia otava ka pewa oufemba tau kalele oo tau holola kutya paife naye oha di moNamibia.

Edi oda yelifwa kOmupopiliko wouministeli Margaret Kalo. Kalo okwa ti Ovanailonga otava ka pewa oufemba oo tau holola kutya ohava di moNamibia molwa ohombo okudja nena.

“Eshi oshe ya po, sha landula omulandu upe wetonatelo lokeengaba han o Immigration Control Regulations. Omulandu mupe, owa eta opo ouministeli wuuye po neefoloma dipe odo da yandja epitikilo opo ovanailongo ovo va hombola Ovanamibia va mone oufemba woku ulika kutya oha di moNamibia, Kalo ta yelifa.

Omupopiliko wouministeli okwa yelifa kutya eshi osha ningwa, kwa landulwa okatendo 22 (1) (C) koImmigration Control Act komudo 1993 kumwe nomulandu 30 womomilandu detonatelo lokeengaba.

Kalo okwa holola kutya oufemba tau holola kutya omunailongo oha di moNamibia paife otau pingafana po noufemba oo vali va pewa nale, tau holola kutya ova ninga ovakwashiwana vaNamibia sheli kwatelela kokatendo 38.

Okwa ti oufemba ile epitiko lokuulika kutya ohava di moNamibia paife ota li ka longifwa ashike ngeenge sha pumbiwa taku landulwa omilandu dokatendo 38.

Oufemba ou otau ka holola kutya omukwashiwana wokodje yoshilongo a hombola Omunamibia oha di moNamibia molwaashi va hombola.

Kalo okwa holola kutya keshe ovalihomboli va hala okupewa oufemba ou ova teelelwa va udife ofooloma kombelewa youministeli woikwameni. Otava indilwa y ova kale va wanifa po aishe oyo tai ka pulwa.

Omupopiliko wouministeli okwa yelifa yo kutya odjapo oyo ya pewa ovalihomboli nale otai ka tambulwa ko natango fiyo tava ka shiivifilwa. Ashike nande ongaho, otava indilwa opo va tule mo omaindilo opo va mone eendjapo dipe meendelelo.

Kalo okwa ti imwe yomoipumbiwa e i ongaashi: ofooloma e i tai pulwa kouminsteli, oufemba wau va hombola naye, oufemba waye mwene omo mwa kwatelwa efano laye ta li ulike oshipala osho ashike osho yo ombaapila yetwomukumo kutya oshike a hala okukala ena ondjapo oyo tai holola kutya oha di moNamibia.

Ovalihomboli natango ovateelelwa va kale va ningwalwa omakonaakono okokanya kovanambelwa vouministeli woikwameni. Omakonakono opakanya otaa ka kwashilipaleka kutya ovanhu ava ovahombolafana tuu shili. Natango, ovalihomboli otava ka pewa omhito yoku talwa ngeenge eehombo davo oda shangifwa ngaho pambelewa.

Kalo okwa ti omunhu opo a mone odjapo ipe, oku na okukala a futa N$1 600.

Okwa weda po ta ti odjapo e i inau pitikilwa ounona va dalwa kovalihomboli voludi e li.

Ounona otava twikile okupula epitikilo lombaapila tai ulike oukwashiwana ile va tule mo eindilo lokupula oufemba waNamibia ngaashi have shi ningi shito she li kwatelela kokatendo 38 koImmigration Control Act komudo 1993 ngeenge ova hala okufiya po oshilongo.

–taimihaihambo2000@gmail.com

The post Ovanailongo va hombola Ovanamibia otava ka pewa eedjapo…okuulika kutya ohava di moNamibia appeared first on New Era.