Doorasho la sii ogyahay natiijadeeda oo ka dhacaysa Dhuusamareeb

Magaalada Dhuusamareeb waxaa maanta ka dhacaysa doorashada madaxweynaha cusub ee Galmudug, taas oo la sii ogyahay in lagu dooranayo Liibaan Axmed Xasan (Liibaan Shuluq).

Liibaan Shuluq oo ka tirsan xisbiga madaxweyne Xasan Sheekh Maxamuud ee Caddaaladda iyo Wadajirka (JSP), wuxuu haystaa inta badan xildhibaanada maamulka Galmudug ee dhawaan lagu soo doortay doorashadii ku celiska ahayd.

Xisbiga JSP wuxuu haystaa 67 mudane oo ka mid ah xildhibaannada baarlamaanka Galmudug oo ka kooban 89 xubnood.

Liibaan Shuluq oo ah ganacsade weyn oo ku cusub saaxadda siyaasadda wuxuu baddelayaa Axmed Cabdi Kaariye (Qoorqoor) oo Galmudug hoggaaminayay tan iyo Febraayo 2020-kii.

PUNTLAND POST