Nyabyenda uregwa kwiba amabuye arengeje miliyari 4Frw arakomeza gufungwa by’agateganyo

Muhanga: Urukiko rw’Ibanze rwa Nyamabuye rwategetse ko Nyabyenda Emmanuel ushinjwa ibyaha bitandukanye byo gucuruza amabuye y’agaciro mu buryo bunyuranyije n’amategeko, akomeza gufungwa iminsi 30 by’agateganyo.

Mu isomwa ry’urubanza ryabaye kuri uyu wa Kabiri taliki ya 06/10/2026, aho Urukiko rw’Ibanze rwa Nyamabuye rwemeje ko ikirego cy’Ubushinacyaha gifite ishingiro.

Rwemeje ko hari impamvu zikomeye zituma Nyabyenda Emmanuel akekwaho icyaha cyo gukora ibikorwa by’ubucukuzi bw’amabuye y’agaciro nta ruhushya, icyaha cyo gucuruza amabuye y’agaciro yacukuwe nta ruhushya; kwiba amabuye y’agaciro no kunyereza umusoro.

Ubushinjacyaha bwasabiye Nyabyenda Emmanuel gukomeza gufungwa iminsi 30 by’agateganyo, kubera ko amabuye y’agaciro yacukuye nta ruhushya yagombye kuba yarubatse Ikigo Nderabuzima abarwayi bivurizamo, Ikigo cy’amashuri y’abana cyangwa umuhanda wa kaburimbo.

Ubushinjacyaha buvuga ko amabuye Nyabyenda ashinjwa kwiba, afite agaciro gasaga miliyari 4 y’amafaranga y’u Rwanda.

Nyabyenda Emmanuel ushinjwa ibi byaha yafatiwe mu Mujyi wa Kigali taliki 09/09/2026 nyuma y’inyandiko isaba ko atabwa muri yombi ku gahato.

Gusa mu iburanisha ry’ubushize Nyabyenda Emmanuel yabwiye Urukiko ko ibyaha ashinjwa atabyemera kubera ko afite impushya zimwemerera gukora ibikorwa by’ubucukuzi bw’amabuye y’agaciro, kandi ko yasuwe n’inzego zitandukanye zifite ubucukuzi bw’amabuye y’agaciro mu nshingano.

Mu cyumba cy’iburanisha hari higanjemo abo mu muryango wa Nyabyenda Emmanuel n’itangazamakuru.

MUHIZI ELISÉE
UMUSEKE.RW