Abraham Mwanyekange

Ngoloneya woshitukulwa shaMusati Immanuel Shikongo okwa yandja eembete 94 dongushu yoshimaliwa N$300 000 koNegumbo Secondary School moshikandjohoololo shaElim Olomakaya.Eembete oda yandjwa melongelo kumwe nombelewa yehongo osho yo ombelewa yaNgoloneya moshitukulwa.

Omaano okwa yandja sha landula eshi ofikola ya ninga efimbo i li momhumbwe yeembete dovanafikola momuhandjo.

Shikongo okwa ti vati ovanafikola vahapu moNegumbo ova kala hava nangala pofulula molwaashi eembete ka da li da wanenena ovahongwa aveshe.

“Olopota otwe i pewa konima yeemwedi mbali da pita kutya ope na omhumbwe yeembete pofikola. Okwa li shi kumwifa okuuda ovanafikola tava nangala pomatalashe a yalwa pofulula,” Ngoloneya ta holola ngao.

Ngoloneya okwa ti kape na omuhongwa te li hongo koshi youpyakadi u li ngaho.

“Omuhongwa iha kofa nawa ita dulu okulihonga nawa.

Onghee eembete edi ota di kwafele ounona vetu va fude po nawa konima va dja keengulumambo.

Nongeenge ova fuwa po nawa nena ota va dulu okulonga shomupondo moilongwa yavo yofikola,” ta ti. Omukulunhufikola Cris Aipanda okwa pandula ombelewa yangoloneya osho yo Kansela wa Elim Lysias Tomas eshi va nyamukula ke kemo lofikola.Ta ti ekwafo lavo ota li ulike kutya epangelo olina kona sha novanafikola osho yo eefikola dokomikunda.

“Paife kape na vali omunafikola ta nangala pedu. Ovahongwa vetu aveshe 600 keshe umwe oku li kombete yaye nota mono eemofi nawa,” ta ti.

Omukulunhufikola okwa ti nande omuhandjo omushona ina hala oku tuma ovanafikola va dje kondje molwaashi oha shi yi moshipala ehongo.

Okwa ti elalakano okupitifa ovanafikola nawa.

“Ngeenge nena ova kala kondje otava ka ninga oinima ihapu.

Vahapu ovashona no itava dulu okulilela voovene.

Ngeenge ve li momuhandjo nena oha shi kala shipu noha tu dulu okuva pukulula nawa nombili.

-amwanyekange@nepc.com.na

The post Ngoloneya waMusati a kwafa oNegumbo neembete 94 appeared first on New Era.