D-square a pitifa “The Official Capacity”

Darius Nghiwilepo nedina la shiivika nawa D-Square okwa pitifa oalbum yaye itihamano yedina “The Official Capacity”.

D-Square okwa ti mo album yaye o i na eengalo da dika pomulongo. Eengalo odi li omaludi a yooloka ngaashi: eengalo dokwaito,heikwa, eengalo dopamufyuululwakalo, afro-house osho yo omaimbilo opamhepo.

D-Square okwa ti okwa shiivikila nawa nokangalo kaye oko a pitifile mo2015 taka ifanwa Egeero.

Okwa ti oalbuma oyo a pitifa paife oya nhuninwa ovaholi veengalo va yookoka molwaashi okwa shika eengalo da kwatela mo omaludi aeshe.

“ Oalbuma e i nda pitifa paife otai wilikwa kokangalo kedina ‘Ebanana’ oko ka fuula ovanhu vahapu moNamibia osho yo kondje yoshilongo, D-Square ta holola ngaho. Okwa ti oalbum oya nhuninwa ovanhu aveshe okudja keembinga neembinga. Natango okwa ti ota ifana ovashikingalo vakwao opo va longele kumwe nokutwikila okuyambididafana meengalo domoshilongo.

“Oshitalendi omo shi li movashikingalo vaNamibia omo, ohava shiki eengalo diwa doo odi na etumwalaka. Sha fimana elongelo kumwe aike opo ashike hatu dulu okuya kokule,” D-Square ta ti.

Okwa weda po kutya ovashikingalo vomoshilongo ove li momashongo ngeenge otashi ya pokuninga oshimaliwa meengalo davo.

Okwa ti elandifo louCD paife ola ninipala neenghono molwaashi ovanhu vahapu paife inava hala vali okulanda ouCD. OuCD itava landwa vali molwa eemhito nomapandja okupwilikina eengalo oo a ninga mahapu paife.

Okwa ti nokuli eetuwa edi dipe paife ihadi longifa vali ouCD ndee oUSB ashike. D-Square okwa nyenyeta kutya ovanhu paife ohava tapele ashike eengalo davo mouUSB ndele tava kala tava longifa oshali. Okwa ti eshi otashi imbi ovashikingalo va mone oshimali vo va kale vena ouvidio vena ongushu.

“Paife onda hala okupitifa okavidio kongalo yange ‘Ebanana’ nonda hala ka kale kena ongushu ,” ta ti.

Okwa ti paife okwa hala ovanhu va tameke okukala tave mu ufana euye a mwenyeke poivilo yavo opo ovanhu va shiive oalbum yaye ipe.

Okwa ti ovanhu ava vehole eengalo daye otava dulu oku mu mona komapadja aye opaungoba osho yo ovo va hala ouyelele kombinga yoalbum yaye ipe.

*-hambelelenindaniel56@gmail.com *

The post D-square a pitifa “The Official Capacity” appeared first on New Era.