Minista wounamapya nounaimuna Inge Zaamwani okwa ti epangelo otali tula moilonga oshikefa shedina NCA Price Equalisation Fund (NPEF) neudo.

Oshikefa otashi lalakanene okukwashilipaleka kutya eengobe dovanafaalama koitopolwa yokonooli oda landwa kondado i fike pamwe naayo yeengobe dovanafaalama vomoushimba.

Zaamwani okwa ti epangelo ola yandja nale oshimaliwa koshikefa eshi.

“Otwa tula yo oshimaliwa moshikefa shokufikifa pamwe eendado, osho sha nuninwa ehangano loMeat Corporation of Namibia (Meatco) opo ngee tava lande eengobe kovanafaalama ava, otava dulu okufuta ondado i fike pamwe naayo yovanafaalama vomoushimba,” osho a ti ngaho.

Zaamwani okwa ti oshikefa eshi osha kala po nale okudja odula yandja ko ashike kakwa li sha tulwa moilonga shaashi okwa li pu na okuhaudafana pokati komahangano a kwatelwa mo.

Okwa ti omikundu odo paife oda potokononwa noshikefa otashi tulwa moilonga neudo.

Sha kolekwa kOkabinete momudo 2024, oshikefa sheemiliona N$100 otashi lalakanene okufuta ovanafaalama ovo ve li kondje yomufinda utilyana eendado di fike pamwe naado dovanafaalama ovo ve li koumbuwanhu womufinda utilyana.

Eemwedi mbali da dja ko, oministeli younamapya oya ti opelesenda ashike imwe oshinghwanyu nhano yeengobe hadi landifwa pambelewa koNCA.

Pefimbo opo, oministeli oya ti ehangano ola ngabeka eemhito doiyemo yovanafaalama vokomikunda notashi kumu nai eyokomesho loshikondo shoimuna koshitopolwa oko.

Oshikefa shoNPEF osha pingena po oLivestock Marketing Incentive Scheme yoNCA, oyo kwa li ya totwa momudo 2015 i yambidide ovanafaalama va dule okulididimikila eenghalo dokulandifa eengobe.

Opolohalama okwa li ya xulifwa po konima outomeno moNCA va pata.

Momutengenekwafaneko wopashiwana womudo 2026/27 epangelo ola yandja eemiliona di li N$50 koshikefa eshi.

Ehangano lovanafaalama ledina Namibia National Farmers Union (NNFU) odula ya dja ko ola indila oministeli yeendelelife etulomoilonga loshikefa, tali ti omakateko otaa endifa kashona eyambukepo lounafaalama komikunda.

The post Oshikefa shokuyambidida ovanafaalama konooli otashi i moilonga – Zaamwani appeared first on The Namibian.