Kamatyona gwomimvo 16, Cornelius Shimwaafeni, ngoka a li a kumitha oshilongo nokutumbalekwa omolwoshilongapondoli shokuhupitha aakwanambwiyu momuthima tagu adhika momukunda Omutundungu moshitopolwa shaMusati, okwa pewa ombandi yesimaneko nuupendafule komupresitente Netumbo Nandi-Ndaitwah.
Egandjo lyombandi kuShimwaafeni olya ningwa mEtitatu pethimbo lyoshituthidhimbuluko shEsiku lyOmapendafule shoka sha ningilwa pomawendo gomapendafule Heroes Acre mOvenduka.
Shimwaafeni okwa li ta litha iikombo sho yina yaakwanambwiyu a piti puye naanona ye yoomwedhi omugoyi nokwe ya umbile momuthima gwomeya.
Pahokololo lyaShimwaafeni, omukiintu ngoka sho a piti puye naanona okwa li ta monika a geya noonkondo molwashoka Shimwaafeni okwa li e mu ithana ashike ine mu pupa.
Lwanima oku umbile okanona kotango momuthima, nokwa landulitha ko okakwawo, noshiningwanima shoka osha ningwa muMei numvo.
Otaku hokololwa kutya Shimwaafeni okwa nukile momeya nokukutha mo aanona mboka nonande keshi okuyoga omeya.
Moonkundathana nonzonkundaneki ndjika muMei, Shimwaafeni okwa popi kutya okwa li a kutha etokolo lyokuya momuthima a hupithe oomwenyo dhaanona mboka nokwa li a tokola a sile momeya opamwe naanona mboka ngele okwa li ineeshi pondola oku ya kutha mo.
Pethimbo ta pewa ombandi yuupendafule, omupresitente Nandi-Ndaitwah okwa tumbaleke Shimwaafeni omolwuupendafule we, nokwa popi kutya okwa li a tokola okuhupitha aanona nonande okwa li e shi kutya ota tula omwenyo gwe moshiponga.
“Ina penduka ongula yesiku ndyoka eshi kutya uupenda we otawu ka tulwa koshiyalo. Ineshi ninga molwashoka opwa li ookamela dhe mu tala. Ineshi ninga nelalakano lyokupewa esimaneko nenge okupewa sha.
Okwa li owala a mono omwenyo gwomuntu gu li moshiponga nokwa tokola a katuke onkatu,”osho omupresitente a popi ngaaka.
“Shoka uupendafule,”osho Nandi-Ndaitwah a popi ngaaka.
Shimwaafeni okwa pewa ombandi osho wo olupandu lwooN$200 000.
Okwiindile onkalo yombepo ombwanawa ngandjoka yi tsikile moshilonga shaNamibia sha manguluka, moka aakwashigwana haya kwathele moshilongo pwaana etegameno lyokupewa sha.
MEtiyali, omupresitente okwa li wo a gandja etumbaleko lyiilonga yuupendafule kAanamibia 1001 omolwedhanonkandangala lyawo mekondjelomanguluko osho wo mboka ya longa shomupondo pankalathano nopamahupilo osho wo metungo lyoshigwana.
“Aantu mbaka oyo twa tala omeho osho wo Aanamibia ayehe mokutsikila nokukwathela oshigwana mondjila yetu yoku shi enditha nawa,” osho a popi ngaaka.
Otaku hokololwa wo kutya omumvo gwa zi ko, Shimwaafeni okwa li natango a hupitha uumatyona uyali, gumwe okuna omimvo hetatu gumwe 10, sho kwa li ya gwile momeya pethimbo kwa li taya litha.
The post Kamatyona a pewa ombandi yuupendafule sho a hupitha aakwanambwiyu appeared first on The Namibian.
Follow the story
