Iiraan: Hormuz sidii hore kuma soo noqon doono

Dowladda Iiraan ayaa sheegtay in Marinka Hormuz uusan dib ugu noqon doonin xaaladdiisii ka hor dagaalka, xitaa haddii heshiis lagu soo afjaro colaadda Bariga Dhexe, iyadoo Tehran ay dooneyso inay sii waddo maamulidda marinkan istaraatiijiga ah.

Wasiirka Arrimaha Dibadda Iiraan, Abbas Araghchi, ayaa sheegay in dowladdiisu ay mas’uuliyad ka saaran tahay la socodka maraakiibta isticmaasha Marinka Hormuz, isaga oo tallaabadaas ku tilmaamay mid la xiriirta xaaladda amni ee gobolka.

“Marinka Hormuz dib uguma noqon doono sidii uu ahaa dagaalka ka hor, xitaa haddii heshiis la gaaro, annaga ayaa maamuli doonna,” ayuu yiri Araghchi.

Hadalka Tehran ayaa imanaya iyadoo Maraykanku uu cadaadis saarayo Iiraan si loo gaaro heshiis ay ku jirto arrinta marinka, halka Iiraanna ay ka digtay inay jawaab ka bixin doonto weerar kasta oo lagu qaado.

Marinka Hormuz ayaa ka mid ah marinnada ugu muhiimsan dunida ee shidaalka iyo gaaska lagu kala qaado, waxaana xiisad kasta oo ka dhacda ay saameyn ku yeelan kartaa suuqyada tamarta iyo ganacsiga caalamka.