ONDANGWA- Ongudu yovanhu va dja komukunda Iikokola oshivike sha dja ko oya ninga omunyanyo wopambili komhangu yaNdangwa tava pula opo omutamanekwa Sinskus Johannes aha pewa omhito yokulifutila mo modolongo.

Johannes weedula 59 okwa kwatwa po neudo konima eshi vati a dipaa mwene womukunda Onelago oo yo ali kapatashu womukunda Iikokola Sem Nepando konima eshi ya shwa nodjebo fiyo ta xulifile ponhele opo.

Okwa ya shwa pefimbo kwa li a hangika moilonga ve li moshihongi shomukunda shokukandula po eenhamanana dovanhu tava kondjele omadu.

Okwa li e li kapatashu womukunda Iikokola omo kwa li tava kundafana kombinga yoshikumhungu shomulumenhu ou e mu dipaa shaashi a wedela ekove laye.

Efiku tuu olo loshihongi natango mwene womukunda Iikokola I-Ben Nashandi okwa monifwa oshiponga konima eshi naye a yashwa nondjebo komulumenhu tuu oo.

Nashandi paife oku li nawa nokwa tameka oilonga yaye.

Ovanamukunda waye, ookaume, ovakwanedimo, okwa li va ngudumana komhangu va nyika oluhodi. Ova ti kutya Nepando okwa dipawa ehe na ondjo.

Ova lombwela mengestrata tava ti Johannes ngeenge okwa di mo modolongo otashi eta oumbada mokati koshiwana shaashi vati okwa nyika oshiponga.

Ova pula omhangu opo i yandje eedula dehandukilo dokukala modolongo komutamanekwa ou shaashi okwa longa oshimbuluma shi nyanyalifa.

Efiku olo oshibofa sha Johannes osha undulilwa komafiku 20 Oktoba nelalakano lokuninga omakonakono.

– fhamalwa@nepc.com.na

The post Omutamanekwa medipao la mwene womukunda a ningilwa omunyanyo … na kale modolongo appeared first on New Era.