Epeya la xwika po eekilomita di dulife po2 000 mEtosha

Eekilomita di dulife po2 000 dEtosha National Park oda pya po eshi ovanhu tava twikile nokulwifa omundilo oo tau langateke oshikunino shonamwenyo.

Etosha National Park oli na ounene weekilomita di li lwopo22 270.

Ouministeli wOmidingonoko, Omakuti nOmapashiyono owa ti ovadimi vomindilo Omaandaxa okwa li ve shi pondola okudima omundilo ou, ashike omhepo natango oye u tema.

Omundilo okudja opo owe lihanena nee onhele oyo hai ifanwa Hakali wa yuka koumbuwanhuushilo woshikunino.

“Etitatu, omakonakono okwa ulika kutya eekilomita odo da pya odi li lwopo2 587,” omupopiliko woministeli Vilho Hangula ta ti.

Omupedu kulunhuwiliki wEtosha Naambo Iipinge okwa ti omundilo paife oushona notau dulu okuwilikwa, ashike omhepo otai twikile nokutula onhele ei moshiponga nadikwao dopondingandinga.

Hangula okwa ti oinima yokukelela omindilo oyo kwa li ya ningwa eemwedi da dja ko otai vatele okukelela omundilo uha tandavele unene.

Okwa ti eengudu dovanhu ovo tava dimi nado otadi konakona eenhele odo da kumwa opo kutalike ngee opu na oifitukuti ya pya.

Oministeli oya ti otai ka yandja ouyelele kombinga yeenhele odo da pya po ngee omundilo wa dimi filufilu.

The post Epeya la xwika po eekilomita di dulife po2 000 mEtosha appeared first on The Namibian.