‘Till Dooms Days’ taka kufa vahapu koipundi

**Max Henrich **

Omushikingalo Trinus Robert nedina la shivika nawa ‘Tilly-Thesinger’ omukalimo womomukunda Etomba okwa hala okuyambula po oshitalendi shaye shokwiimba eengalo kuye mwene nopaife okwa pitifa oalbum yaye puhe na nande ou emuvatela.

Tilly okwa ti okwa tekulwa kumeekulu waye momukunda Oshalumbu mOkongo neengalo osho shimwe shomoinima oyo a kala ehole unene.

Okwa ti oalbum yaye e i a pitifa tete mo 2023 yedina “I am the singer,” nokonima okwa ka pitifa itivali hai ifanwa ‘Till Dooms Day’ mo 2026. Neengalo daye edi okwe di pitifa oye auke puhe na nande oye omuyambididi umwe.

Tilly okwa ti oha shiki eengalo doludi keshe ngaashi afrobeat, amapiano, dancehall, kwaito osho yo eengalo domOshiwambo nomoEnglish.

Okwa ti eengalo daye odili unene kombinga yohole, ombili, oukumwe, eelineekelafano osho yo okutwa ovanhu omukumo va kale velinekelafana. Robert meenghundafana na Kundana okwa hokolola kutya olweendo laye ka la li lipu unene tuu ngeenge tashi ya pokupitifa eealbum odo.

Ta ti okupitifa eengalo oku na ondilo. Okwa weda po kutya natango okwa kala yo ha ulwa omalaka mai kovanhu ashike eshi ina shi mu teya omukumo.

“Onda kala ndina ombili nakeshe umwe osho yo elandulafano naashi kwali sha fimana kwaame omailikano ,” ta ti.

Tilly okwa ti ovashikingalo ngeenge opo ta veya mowela ohava kala va pumbwa ekwafo lihapu. Okwa ti ovanhu omo veli momindingonoko omo vena eshiivo lokuimba ndele molwaa oyuuyemo itava dulu okuya komesho.

Okwa pula epangelo li kale ta li tale ovashikingalo nokuva yambindinda.

Tilly okwa indila opo eeDj, eeradio, oivilo yomalihafifo moshilongo va kale tava dana eengalo dovashikingalo vomoshilongo.

[email protected]

The post ‘Till Dooms Days’ taka kufa vahapu koipundi appeared first on New Era.