Abakozi ba RMB bari bakurikiranywe n’Ubushinjacyaha bakiriye inkuru nziza

Muhanga: Urukiko rw’Ibanze rwa Nyamabuye rwemeje ko Uwamamhoro Fiona na mugenzi we Assoumani Bienfait barekurwa.

Ubushinjacyaha mu iburanisha ry’ubushize bwavugaga ko abaregwa bakurikiranyweho icyaha cyo kutamenyekanisha icyaha cy’ubugome cyangwa gikomeye, icyaha giteganywa kandi kigahanishwa ingingo ya 243 y’Itegeko nimero 68/2018 riteganya ibyaha n’ibihano muri rusange.

Ubushinjacyaha kandi bwabaregaga kuba icyitso mu cyaha cyo gukora ibikorwa by’ubucukuzi bw’amabuye y’agaciro nta ruhushya, kuba icyitso mu cyaha cyo gucuruza amabuye y’agaciro yacukuwe mu buryo bunyuranyije n’amategeko, no kuba icyitso mu cyaha cyo kwiba.

Ubugenzacyaha bwaketseho Assoumani Bienfait na Umahoro Fiona ibyaha byo Kutamenyekanisha icyaha cy’ubugome cyangwa gikomeye, kuba icyitso mu cyaha cyo gukora ibikorwa by’ubucukuzi bw’amabuye y’agaciro nta ruhushya, kuba icyitso mu cyaha cyo gucuruza amabuye y’agaciro yacukuwe mu buryo bunyuranyije n’amategeko, no kuba icyitso mu cyaha cyo kwiba; bubakurikirana bafunzwe.

Mu iburanisha ry’ubushize Uwamamahoro Fiona na Assoumani Bienfait bahakanye ibyaha bashinjwa bakavuga ko boherejwe gukora ubugenzuzi ko nta cyemezo bari gufatira iyo Kampani.

Bakizeza Urukiko ko baramutse barekuwe by’agateganyo nta perereza babangamira, kandi ko biteguye kubahiriza amabwiriza Urukiko rubategeka.

Abaregwa basaba gukurikiranwa bari hanze.

Nyuma y’iperereza Ubushinjacyaha bwakoze bufatanije na RIB bwasanze kugeza ubu nubwo iperereza rigikomeza, nta gihamya ko babikoze bafite umugambi mubisha cyane ko ubutumwa bahawe kugenzura SEAVMC babukoze, ibyo baba bataranogeje bikaba bikwiriye gufatwa nk’amakosa, keretse habonetse ibindi bimenyetso simusiga nyuma bigaragaza ko ibyo bakoze bigize icyo cyaha kuri bo cyangwa ku bandi.

Ubushinjacyaha busoza busaba ko Urukiko rwafata icyemezo cyo gufungura abakekwa.

Urukiko rurasanga, kuba Ubushinjacyaha bwari bwarareze busaba ifungwa ry’agateganyo, ariko nyuma bukaba busabye ko abaregwa bafungurwa, bukaba buretse ikirego, bityo uku kureka ikirego k’Ubushinjacyaha gukwiriye kwemezwa, Uwamamahoro Fiona na Assoumani Bienfait bafungurwa by’agateganyo.

Abo mu muryango wa Uwamahoro Fiona bamusanze kuri Sitasiyo ya Polisi iherereye mu Murenge wa Nyamabuye akimara kurekurwa

MUHIZI ELISÉE
UMUSEKE.RW/Muhanga