Ovadali na va longele kumwe novahongifikola– Hamatwi

OKATOPE- Omukulunhuwiliki wehongo moshitukulwa shaHangwena Isak Hamatwi yelifa ta ti ka pena omunafikola a tewa kofikola Mandume Ndemufayo Primary School ashike ovanafikola okwa li va lombwele opo va kululwe ndele ina va hala, ngaashi naana vakwao aveshe va kululwa.

Okwa ti ofikola oya tula po omilandu kutya ovanafikola aveshe navakululwe ashike ovanafikola vamwepo ka kwa li va hala okuliufa komilandu.

Hamatwi okwa li ta popi ta nyamukula kombinga yoshikumungu shovanafikola vopofikola Mandume Ndemufayo Primary School taku hokololwa kutya Omaandaxa ova taatawa mofikola shaashi ina va kululwa.

Ofikola Mandume Ndemufayo Primary School oi li momukunda Okatope moshitukulwa shaHangwena.

Hamatwi okwa kumaida ovadali opo va kale tava longele kumwe novahongifikola shaashi eshi sha fimana kovanafikola ve li umbata nawa.

“Omudali ngeenge okushi kutya okaana kaye okashunifwa ko keumbo molwaashi ina ka hala okulifa komilandu dofikola, okwa li a wana okupopya nokaana kaye ndele teya kofikola a pule kutya omolwashike okaana ka tewa kofikola,” ta ti.

Okwa yelifa ta ti keshe ofikola oina omilandu da tulwa, da pumbwa okulandulwa kovanafikola osho yo kovanadali.

“Ngaashi naana keshe keumbo lina eemhango ile moshilongo muna eemhango da tulwa po koveta ndele itashi kutya omunafikola shaashi a dja keumbo lanhumba ina landula omilanda da tulwa po,” ta ti.

Okwa kumaida ovadali opo va kale tava popi nounona vavo kombinga yomikalo davo shaashi osha fimana ngeenge okaana ta keli umbata nai.

“Okaana ngeenge aka pwilikine kovadali wako nena otaka dulu okupwilikina kovahongifikola ngeenge taku tiwa naka kululwe ngaashi vakwao va kululwa,” ta ti.

Hamatwi ovadali ngeenge va lopotelwa kombinga younona vavo va shunifwako okudja kofikola, na va kale tava ka fika kofikola ndele tava pwilikine komukulunhufikola kombinga yetomheno.

“Elongelokumwe ola fimana pokati kovanhu. Ofikola ngeenge ya tula po omilandu ngaho otai xwaxwameke ovanafikola va kale ve na omikalo diwa ndele tave li hongo nondjungu va dule okupita nawa,” ta ti.

Umwe womuhongifikola a longo pofikola Mandume Ndemufayo Primary School okwa hokolola ta ti ovanafikola ve li meendodo da yooloka okwa li va lombwelwa konima oivike ivali opo va kale va kululwa ashike ina va hala.

“Eshi vaye kofikola Omaandaxa otwe va shunifa ko ndele hatu va lombwele kutya na kululwe ngaashi vakwao,” ta ti.

Okwa ti efiku landula ko vamwe ovaye kofikola va kululwa ashike vakwao natango onghee tava twikile ina hala okulandula omilandu dofikola.

“Omaandaxa omutaleli shikandjohongo okwa li e ya kofikola yetu ndele ta fatulula nghene sha fimana okulandula omilandu dofikola,”ta ti.

[email protected]

The post Ovadali na va longele kumwe novahongifikola– Hamatwi appeared first on New Era.