Omunailonga komina koUis a xulifila moilonga

Omunailonga wehangano loikwamina ledina Uis Tin Mining Company, Fillemon Mwashidange, okwa xulifa manga a li moilonga Omaandaxa.

Ehangano ola koleka efyo laMwashidange momukanda wa shangelwa ovanailonga novayandji voilonga Omaandaxa.

Omunambelewa akula mehangano eli Dan Hattingh okwa ti ehangano ola nyematekwa kefyo eli notali yandje omahekeleko kofamili yaMwashidange, ookaume novanailonga pamwe naye.

“Otwa nyematekwa nai kedjepo eli nohatu yandje omahekeleko kofamili yomunailonga, ookaume novanailonga pamwe naye pefimbo eli lidjuu,” Hattinght ta ti.

Ehangano inali yeleka kutya oshikwashike sha etifa efyo laMwashidange.

Ashike nee, ehangano lovanailonga vomeemina ledina Mineworkers Union of Namibia (MUN) ola ti Mwashidange okwe lidenga po manga a li moilonga ndee ta xulifa konima.

Mwashidange naye okwa li yo omunashipundi woshitai shehangano eli moUis.

Omunashipundi wehangano eli lovanailonga koshitopolwa shokouninginino Niklaas Afrikaner okwa ti ovanailonga ovo va mona eshi Mwashidange e lidenga po nava pewe omhito yokuungaunga naasho sha ningwa po opo va dule nawa okualukila koilonga.

Okwa ti oinyangadalwa yoilonga okwa li ya tameka ponhele opo pa ningilwa oshiningwanima konima ashike eshi sha ningwa, osho sha fininika ehangano li pule ekaleko loilonga lopakafimbo.

“Ehangano ola itavela kutya sha landula oshiningwanima sholudi eli, oilonga itai dulu ashike okutwikila ngaashi shito,” osho a ti ngaho.

Afrikaner okwa ti oilonga inai tetekela eameno nonghalonawa yovanailonga sha landula efyo monhele yoilonga.

Ehangano lovanailonga ola pula ewiliko li pe ovanailonga efimbo nomhito yokulila omunailonga pamwe navo ndee tali yandje omayakulo exungomwenyo kwaavo va mona oshiningwanima eshi.

Afrikaner okwa ti ovanailonga ovo va mona eshi Mwashidange te lidenge po inaku lineekelwa ashike va alukile koilonga inaku talika kutya oshiningwanima eshi oshe va kuma ngahelipi.

“Onghee nee ohatu pula kuyandjwe omayakulo exungomwenyo kovanailonga ovo va kumwa koshinima eshi meendelelo,” osho a ti ngaho.

Ehangano lovanailonga natango ola hala ponhele opo pa ningilwa oshiningwanima pa tonatelwe opo ouyelele aushe wa pumbiwa u dule okumonika pefimbo lomakonakono.

Afrikaner okwa ti omakonakono naa mone kutya oshike sha ningwa po manga Mwashidange ine lidenga po ndee ta xulifa, taa tofa mo osheetifi nokumona kutya omilandu dilipipo tadi dulu okukelela oiningwanima yoludi eli iha holoke vali.

Natango, Hattingh okwa indila ovanailonga vaha feekele kombinga yosheetifi shoshiningwanima eshi shefyo laMwashidange ile va yandje omauyelele inaa kolekwa komalungula.

Okwa ti ehangano otali ka yandja ouyelele wa wedwa po ngee omilandu domondjila da manifwa.

The post Omunailonga komina koUis a xulifila moilonga appeared first on The Namibian.