Jabhada TPLF oo taliye sare ku eedeeysay khiyaano Qaran

Jabhadda Xoreynta Shacabka Tigray (TPLF) ayaa si adag u cambaareysay mid ka mid ah saraakiisheeda ugu sarreeya ee militariga, Sarreeye Guuto Yohannes W/George, kaddib markii uu Axaddii isu dhiibay ciidamada dowladda federaalka Itoobiya.

TPLF ayaa taliyahan ku eedeysay inuu galay fal ay ku tilmaantay “khiyaano qaran”, iyadoo sheegtay inuu xiriir la sameystay dhinaca ay u aragto cadowgeeda, kaddib dagaalladii ugu dambeeyay ee ka dhacay gobolka Tigray.

Jeneraal Yohannes, oo sidoo kale loo yaqaan John Medid, ayaa ka tirsanaa taliska dhexe ee TPLF, wuxuuna ahaa taliyaha ciidamada ee aagga koonfurta gobolka Tigray. Is-dhiibistiisa ayaa imaaneysa xilli ay sii kordhayaan xiisadaha iyo iska horimaadyada ka dhex jira dhinacyada isku haya awoodda iyo gacan ku haynta deegaannada gobolkaas.

Sida ay ilo wareedyo sheegeen Jeneraal Yohannes, ilaaladiisa gaarka ah iyo toddoba taliye oo kale oo darajadoodu tahay gaashaanle sare ayaa lagu hareereeyay deegaanka Qushee Simret, oo ka tirsan degmada Rama ee bartamaha gobolka Tigray.

Wararka ayaa sheegaya in ciidamada dowladda Itoobiya iyo xoogag deegaanka ah oo xulafadooda ah ay ku hareereeyeen goobta ay ku sugnaayeen saraakiishaasi, taasoo ugu dambeyn keentay inay isu dhiibaan ciidamada dowladda.

Dhanka kale, dowladda federaalka Itoobiya weli si rasmi ah ugama hadlin warka ku saabsan is-dhiibista Jeneraal Yohannes iyo saraakiisha la socotay, mana jirto war-saxaafadeed ay ku xaqiijisay faahfaahinta dhacdadaasi.

Hase yeeshee, Taliyaha Ciidamada Ammaanka Tigray, Sarreeye Gaas Gabraigzaaber Bayyanaa, oo sidoo kale loo yaqaan Waddi Anxiruu, ayaa BBC-da u xaqiijiyay in Jeneraal Yohannes uu isu dhiibay ciidamada dowladda Itoobiya.

Taliyaha ayaa sheegay inuu telefoon kula hadlay Jeneraalka, isagoo xusay in labadoodu ay ahaayeen saaxiibo iyo saraakiil muddo wada shaqeynayay, isla markaana ay arrintani ku tahay xaalad aanu si fudud uga hadli karin.

“Telefoon ayaan kula hadlay. Wuxuu ahaa saaxiibkay iyo taliyahaygii, sidaas darteed si fudud ugama hadli karo arrintiisa. Waa wax wanaagsan inuu nool yahay, waxa ugu muhiimsanna waa inay kulmeen,” ayuu yiri Gabraigzaaber Bayyanaa.

Haddii si rasmi ah loo xaqiijiyo dhammaan faahfaahinta ku saabsan is-dhiibista Jeneraal Yohannes iyo saraakiisha la socotay, falanqeeyayaasha arrimaha amniga ayaa qaba in dhacdadani saameyn ku yeelan karto awoodda iyo isku-duubnaanta ciidamada TPLF.

Jeneraal Yohannes wuxuu ahaa sarkaal sare oo ka tirsanaa hoggaanka milatariga TPLF, waxaana xilka uu ka hayay koonfurta Tigray uu siinayay door muhiim ah oo la xiriira hoggaaminta iyo isku dubbaridka ciidamada aaggaasi.

Dhacdadan ayaa sidoo kale dhalin karta su’aalo ku saabsan xaaladda gudaha ee hoggaanka militariga TPLF, gaar ahaan xiriirka ka dhexeeya saraakiisha sare iyo sida ay uga falcelinayaan xaaladaha cusub ee amni iyo siyaasadeed ee gobolka Tigray.

Ilaa hadda, faahfaahinta rasmiga ah ee ku saabsan sababaha keenay is-dhiibista jeneraalka iyo halka uu hadda ku sugan yahay si buuxda looma shaacin.