YiNtatheli kaMthunywa IZAKHAMIZI zeMuwandi, indawo eseduzane ledolobho leKwekwe, ziphethe izibindi ngezandla kulandela ukuphuma kombiko wokuthi kulezilwane eziyisitshiya galombili ezibonakale zizula zula emphakathini ngoMvulo. Indawo yeMuwandi ingamakhilomitha angaba ngu-15 ukusuka enzikini…
YiNtatheli kaMthunywa
IZAKHAMIZI zeMuwandi, indawo eseduzane ledolobho leKwekwe, ziphethe izibindi ngezandla kulandela ukuphuma kombiko wokuthi kulezilwane eziyisitshiya galombili ezibonakale zizula zula emphakathini ngoMvulo.
Indawo yeMuwandi ingamakhilomitha angaba ngu-15 ukusuka enzikini yedolobho leKwekwe njalo ingaphansi kwekhansili yeZibagwe Rural District Council.
Umgcinisihlalo weKwekwe District Civil Protection Unit (CPU), uMnumzana Fortune Mupungu, uqinisekise ukuthi izilwane lezi zibonakele njalo iqembu elihlanganisa ingatsha ezehlukeneyo selithunyelwe ukuya zidinga.
“Sithole umbiko othi kulezilwane ezibhodayo eMuwandi. Sithumele iqembu eligoqela amapholisa, ibutho, iZimparks lezinye ingatsha ukuze zizame ukuzidinga zibiselwe endaweni yazo,” kutsho uMnu Mupungu.
UDistrict Development Coordinator weKwekwe uthe iDistrict Civil Protection Unit isiqalise ukusebenza ukuze kuvikelwe izakhamizi.
“Ihofisi yami isiphenduke yaba yindawo yokulawula umsebenzi lo njengoba sisebenza nzima ukubisela inyamazana lezi endaweni yazo.”
Ababona ngezokulondolozwa kwemvelo lezinye ingatsha zikaHulumende bathe umsebenzi wabo ugxile ekuvikeleni abantu ngesikhathi bezama ukuthungatha izilwane lezi ukuze bazibisele endaweni yazo.
Izakhamizi zikhuthazwe ukuthi zihlale ezindlini njalo zingazami ukusondela loba ukuxotsha izilwane nxa zingabonakala.
Uzulu ucelwa ukuthi abikele amapholisa loba abeZimParks masinyane nxa bengabona loba bengathola ulwazi ngendawo lapho okubonakale khona izilwane.
Ukuqheliswa kwendawo zokuhlala lokungena kwabantu endaweni ezazisetshenziswa zinyamazana zendle sekukhulise udubo lokungezwani phakathi kwabantu lenyamazana kwezinye izigaba zelizwe.
Follow the story
