Ouministeli woyeendifo otau ka ngonopaleka omilandu dokushinga

**Hambeleleni Daniel **

Omupedukulunhu ko s h ikondo shoyeendifo Damien Mabengano okwa holola kutya oshikondo melongelo kumwe nouministeli woyeendifo noilonga otau ka nghonopaleka omilandu dokushinga.

Mabengano okwa yandja oshipopiwa eshi ponhele yaMinista woyeendifo noilonga Veiko Nekundi.

Pefimbo ta yandje oshipopiwa, Mabengano okwa pula opo eefikola dokushinga osho yo ovahongi vado di yandje omilandu dado odo hadi longifa ngeenge tadi longo ovanhu okushinga.

Omupedukulunhu okwa holola kutya omilandu otadi pulwa molwaashi ouministeli owa hala okunghonopaleka ongushu yomadeulo ovashingi. Eshi otashi ka kwafa yo okuxwepopaleka oiponga yomeendjila moshilongo.

Minista woyeendifo noilonga Veiko Nekundi okwa li a takela omunwe ovanhu ovo hava lande omikanda dokushinga.

Minista okwa li a holola kutya eshi osha nghika oshiponga noha shi eta oiponga yomeendjila.

Minista okwa li yo a holola kutya ova hala ovalongi vokushinga va kale hava ningilwa omakonakono koNatis opo va talike ngeenge ovena tuu owino ya wana okulonga ovanhu okushinga.

Minista ekwa li edi popya pefimbo a ongaleka ovadeuli veefikola dokushinga moSwakopmund.

Minista okwa li yo a kunghilila ovo tava landifa omikanda dokushinga opo veshi fele okalambo.

“Keshe omunambelewa taka kwatwa ta landifa omukanda wokushinga ile ta vakele ovanafikola ekonakono oku na okukufwa omukanda waye wokushinga, ndele tadi mwa mo momambo omikanda dokushinga opo a ha shinge vali,” Minista a holola.

Okwa twikila ta ti eemwenyo dovanhu iha di dulu okulandwa ngaashi omikanda dokushinga odo tadi landwa kovanhu.

Minista okwa li yo a holola kutya ovanambelewa vaNatis itava ka pitikwa vali va talele ovanhu ovo tava shange neengodi shaashi vati ohava pukulula vakwao.

Minista okwa ti aishe e i otai ka tulwa moilonga opo ku nghonopekwe okushinga nokushunifa oiponga yomeendjila pedu.

*-hambelelenidaniel56@gmail.com *

The post Ouministeli woyeendifo otau ka ngonopaleka omilandu dokushinga appeared first on New Era.