Ohonde oya fimana okuxupifa eemwenyo

ONGWEDIVA- Omunambelewa wehangano lokuyandja ohonde konooli loNAMBTS Adolf Mwafangeyo okwa yelifa ta ti ohonde oya fimana okuxupifa eemwenyo dovanhu ve li moipangelo.

Okwa weda po ta ti ohonde e i tai yandjwa koshiwana ohai kwafele ovanhu vena omikifi da yooloka ngaashi okaangela, pefimbo oomeme tava pulumuna, omunhu ngeenge ta tandwa nosho tuu omikifi dikwao.

“Ngeenge a tu lombwele oshiwana shi ka yandje ohonde oha shi kala tashi ti pamwe omashendjo. Omunhu ngeenge okwe li hange eli moshipangelo opo ne a kala ena oudeko lefimano lohonde shaashi ye mukwafela,” ta ti.

Okwa lombwela oshiwana opo shi topolafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde.

Mwafangeyo okwa pula oshiwana opo shi holoke momwaalu muhapu okukayandja ohonde shaashi oshilongo paife osha taalela eshongo linene lohonde ina i wana okuyandja kovanhu ve li momhumbwe yohonde koipangelo.

Okwa yelifa ta ti omwaalu wovanhu tava ka yandja ohonde owa shuna pedu paife, naashi otashi ulike fano lii.

Okwa weda po ta ti omahangano a yooloka okwa manguluka okuufana ovanambelewa vehangano lavo, ndele tava ka kufa ovanhu ohonde.

“Ohatu dulu okufika peenhele da yooloka ngeenge kuna ovanhu ve na ohokwe yokuyandja ohonde,” ta ti.

Mwafangeyo okwa li yelifa ta ti elalakano lokuya keenhele da yooloka okuxwaxwameka oshiwana shi kale shina eudeko la wana kombinga yefimano lohonde.

Okwa ti natango otava twikile okukala tava i keefikola osho yo koiputudilo ya yooloka molwaashi oko unene kuna ovanyasha vahapu hava kala ve na ohokwe okuyandja ohonde.

Okwa panduala ovanafikola novalihongi aveshe ve na ohokwe yokuyandja ohonde shaashi eshi otashi tu ovanyasha vakwao omukumo.

Okwa ti unene tuu eshi va taalela efimbo lomatanga manene, osha fimana ngeenge oshiwana tashi yandje ohonde molwaashi opo i dule okulongifa koipangelo una ovanhu tava i ko.

Okwa weda po ta ti endiki lavo li li moshipangelo shaShakati oha li longo Omandaaxa keshe okudja potundi 10h00 fiyo 18h00.

Okwa ti NAMBTS ota twikile okukwashipaleka kutya ovanhu ve li momhumbwe yohonde koipangelo ova pewa ohonde opo eemwenyo davo di xupifwe. [email protected]

The post Ohonde oya fimana okuxupifa eemwenyo appeared first on New Era.