Safaarada Mareykanka ee Itoobiya oo digniin adag soo saartay

Dowladda Mareykanka ayaa digniin amni soo saartay, iyadoo ka digtay suurtagalnimada weerarro lagu qaadi karo saldhigyada ciidamada milatariga Itoobiya inta lagu guda jiro bishan Oktoobar.

Safaaradda Mareykanka ee magaalada Addis Ababa ayaa sheegtay inay la socoto xog ku saabsan khatar la xiriirta weerarro laga yaabo in loo adeegsado gantaallo riddo dheer, kuwaas oo lagu bartilmaameedsan karo saldhigyada ciidamada Itoobiya.

Safaaradda ayaa muwaadiniinta Mareykanka uga digtay inay u safraan qaar ka mid ah gobollada Itoobiya, gaar ahaan Amxaarada, Tigrayga iyo Canfarta, iyadoo sheegtay in xaaladda amni ee deegaanadaasi ay tahay mid u baahan feejignaan dheeraad ah.

Digniinta ayaa sidoo kale khuseysa muwaadiniinta Mareykanka ee hadda ku sugan gobolladaas. Safaaradda ayaa kula talisay dadkaasi inay si degdeg ah uga baxaan goobaha ay ku sugan yihiin haddii ay helaan waddooyin ama fursado ammaan ah oo ay uga bixi karaan.

Haddii aysan jirin waddo ammaan ah oo ay uga baxaan deegaanadaas, muwaadiniinta Mareykanka ayaa lagu wargeliyay inay u guuraan goobo ammaan ah, isla markaana ay halkaasi ku sugnaadaan ilaa xaaladda amni ay ka degto.

Digniintan ayaa kusoo beegmaysa xilli xaaladda amni ee qaybo ka mid ah Itoobiya ay weli tahay mid xasaasi ah, gaar ahaan deegaanada ay hore uga dhaceen colaadaha hubeysan iyo iska horimaadyada u dhexeeya ciidamada dowladda iyo kooxaha hubeysan.

Safaaradda Mareykanka ma aysan shaacin cidda ay aaminsan tahay inay mas’uul ka noqon karto weerarrada laga cabsi qabo, sidoo kale ma aysan bixin faahfaahin dheeraad ah oo ku saabsan goobaha gaarka ah ee laga yaabo in la beegsado.

Si kastaba, digniinta ku saabsan isticmaalka gantaallada ridada dheer ayaa sare u qaadaysa walaaca laga qabo in haddii weerarradu dhacaan ay saameyn ku yeelan karaan xarumaha ciidamada iyo sidoo kale dadka rayidka ah ee ku nool ama ku dhow goobaha militari.

Mareykanka ayaa sidaas darteed muwaadiniintiisa ugu baaqay inay si dhow ula socdaan digniinaha iyo tilmaamaha amni ee Safaaradda Mareykanka, ayna ka fogaadaan meelaha ay suuragalka tahay inay ka dhacaan weerarro ama isku dhacyo.