Omukainhu ena oungundi wopamadilaadilo a kwatwa onghonga

Opolifi moshitukulwa shaShikoto otai konakona oshibofa shomakainhu weedula 25 ena ounghundi wopamadilaadilo vati a kwatwa onghonga komulumenhu ndele ta faduka po.

Oshiningwanima osha ningwa oshivike sha dja ko momukunda Oshimangwashongete, moshikandjohoololo shaMuthiya, efimbo lokomatango. Omupopiliko wopolifi, Omupedu komufala Kauna Shikwambi okwa koleka onghundana ei.

Opolifi oya hokolola tai ti omukainhu ou okwa li ta ende moixwa a uka keumbo ndele ta nhukilwa komulumenhu. Omulumenhu ou vati okwe mu longela omunyonena wopaixulo eshi a mu kwata keenghono. Opolifi oya koleka tai ti omufekelwa ou i na kwatwa po fiyo onena.

Omafyo ombaadilila

Oshiningwanima shikwao, olutu kokaana kokadona keedula mbali ole li tuwa mexuliloshivike monduda ya xe efimbo lokomatango.

Osha ningwa molukanda Oshoopala mOshakati. Otaku hokololwa kutya okaana aka okali haka di naxe oo vati ena oulema. Fiyo opapa kape na ouyelele kombinga yoshietifi shefyo lokaana aka. Oshiningwanima shikwao, omulumenhu weedula 39 naye olutu laye ole li tuwa meumbo lavo efimbo longula momukunda Ondambombali moshitukulwa shaShana.

Opolifi oya hokolola tai ti omulumenhu ou okwa kala a didilikwa ena oudu wonhumba.

Natango, okwe li tuwa olutu lomukulupe weedula 62 meumbo laye komukunda Uis efimbo lokonguloshi. Otaku hokololwa kutya omukulupe ou kwa didilikwa ena oudu wonhumba. Omokonakono opolifi otaa twikile moikumhungu aishe ei.

-fhamalwa@nepc.com.na

The post Omukainhu ena oungundi wopamadilaadilo a kwatwa onghonga appeared first on New Era.