Epangelo ota li lwifa omukifi wekondo nelaka

Hambeleleni Daniel

Omupresidente Netumbo Nandi-Ndaitwah okwa ti epangelo ole li manga oukuni kumwe okukondjifa omukifi wekondo nelaka oo wa tukuluka modoolopa yaKarasburg moshitukulwa sha!Kharas.

Presidente okwa ti eengobe da fika po29 000 oda li da ningilwa omakonakono omo eendokotola doimuna da koleka kutya oimuna ya fika po 127 oya monika omukifi wekondo nelaka.

Oimuna ya kwatwa komukifi ou otaku hokololwa ya dja meefaalama 11 da yooloka.

Otaku hokololwa omukifi wekondo nelaka wa tongololwa tete momafiku 22 Septemba nowa kolekwa komanyamukulo okudja mongulu youdindoli hano meelabolatoli.

Oimuna ya fika po199 oyo ya li ya ningilwa omakonakono otete omo oimuna 10 ya monika ya kwatwa komukifi wekondo nelaka momafiku 23 Septemba.

Ouministeli wounamapya nounaimuna owa holola kutya oimuna ya monika omukifi wekondo nelaka petameko oya dja koshitukulwa sha !Kharas. Natango, otaku hokololwa oimuna aishe oyo ya weda komwaalu waikwao oyo ya li ya kwatwa pehovelo natango ya dja moshitukulwa shimwe nonande oitukulwa aishe konyala ya ningilwa omakonakono.

Nandi-Ndaitwah okwa ti ova tula po omhango yanyaa kehonga opo va dule okukeelela omukifi ou opo u ha tandavele.

Eemhango da tulwa moilonga ongaashi okukaleka manga omalinyengo oimuna, okulandifa ombelela osho yo oku i tuma kondje yoshilongo.

Omupresidente okwa holola yo kutya epangelo ola tuma ovanambelewa vouhaku woimuna va fika po20 koshitukulwa osho sha monika omukifi wekondo nelaka opo di ka konakone nokufinda omukifi ou.

Natango okwa ti opolifi oya ninga omainda ena sha nokutala ngeenge ovanhu otava tumu natango oimuna okudja keenhele da yolokafana nelalakano okukelela omukifi u ha tandavele.

NNN okwa ti natango ova ninga onghendabala yokulonga nawa odalate yokeengamba da Namibia na Botswana osho yo kombinga ya South Africa.

“Oimuna nombelela oya fimana ngeenge tashi ya keliko loshilongo molwaashi ohai kwafele ovanafaalama,” Nandi-Ndaitwah ta ti. Omupresidente okwa ti natango omukifi ou ouli wa denga oshilongo pedu unene tuu ngeenge tashi ya pokutuma ombelela kondje yoshilongo oko haku di oyuuyemo.

Okwa lombwela ovanangeshefa noovene voimuna opo va longele kumwe nepangelo opo va dule okufinda omukifi wekondo nelaka.

–hambelelenidaniel56@gmail.com

The post Epangelo ota li lwifa omukifi wekondo nelaka appeared first on New Era.