Ovalumenhu vatatu va tulwa moipandeko shi na sha nomunyeka

Ovatamanekwa vatatu ovalumenhu vomido o25,33 no34 ova tulwa moipandeko Omaandaxa konima yokafimbo kaxupi eshi vati va nyeka ovatalelipo oinima yavo kohotela mOtjiwarongo.

Omukulunhu woipambele yomoshiwana yopolifi moshitopolwahoololo shaTjozondjupa, Inspekta Maureen Mbeha, okwa lombwela oNampa Omaandaxa kutya ovatamanekwa vatatu otaku feekelwa va dja kOvenduka.

Omakonakono opetameko opolifi aa holola kutya konima yokafimbo kashona eshi ovatalelipo, omulumenhu (59) nomukainhu (53), va ya meepaakinga dohotela, okwa dja okatuwa ndee ta ke ya posheendifo shavo.

“Ovatamanekwa vati ova kondjifa va ye mosheendifo shovatalelipo ndee tava nyeke mo eendjato di na oimaliwa, omafano, eepassiporta noinima ikwao yongushu,” Mbeha ta ti.

Ovatamanekwa vati ova shinga ndee tava faduka po va yuka koKalkfeld.

Mbeha okwa ti opolifi okwa li ya lopotelwa ndee tai ningi omainda mondjila oyo ya yuka koKalkfeld.

Otuwa yovatamanekwa okwa li ya kwatwa ko ndele ovalumenhu ava vatatu tava mangwa po.

Oinima aishe oyo kwa li ya vakwa po, mwa kwatelwa oimaliwa oya hangika mosheendifo.

Ovatamanekwa okwa li va teelelwa va holoke mOmhangu yaMangestrata mOtjiwarongo onghela.

Osheendifo shavo nasho osha kwatwa ko manga taku ningwa omakonakono.

Mbeha okwa ti ovatalelipo ova fika moshilongo okudja koAmerica momafiku 05 Septemba nokwa li va yuka kEtosha Omaandaxa eshi oshiningwanima sha holoka.

Omakonakono opolifi otaa twikile.

Moshiningwanima shikwao sha yooloka okamati (11) ke li mondodo onhinhano oka hangika ka xulifa momulamba koRehoboth konima eshi inaka alukila keumbo eshi ofikola ya dimbuka Etitano.

Olutu lokamati aka ola monika koukadona tava shingi oikombo konhopa yOanob River koRehoboth omutenya wOlomakaya, she likolelela kolopota yopolifi.

Okamati oko Gerphardt Doeseb.

Omupopiliko wopolifi wopashiwana omupedu komisina Kauna Shikwambi okwa ti okamati vati inaka alukila keumbo okudja kofikola Etitano nokwa li kwa lopotwa kutya oka kana efiku la landula.

“Olutu laye ola hangika li na oipulumuna novakwapata vaye ova shiivifilwa,” Shikwambi ta ti.

Opolifi oya ti oshiningwanima eshi oshedipayo nomakonakono otaa twikile.

-Nampa

The post Ovalumenhu vatatu va tulwa moipandeko shi na sha nomunyeka appeared first on The Namibian.