Kwa dhimbulukwa esiku lyoompanda muuyuni… okudhipaga oompanda kwa shonopala

Victoria Immanuel

Uuministeli womidhingoloko iixwa nomapashiyono owa dhimbulukile pamwe niilongo iikwawo muuyuni esiku lyoompanda.

Esiku ndyoka oha li dhimbulukwa omumvo kehe muuyuni momasiku 22 Septemba okutse ya nokusimaneka osho wo okukaleka po oompanda.

Uuministeli womidhingoloko owa li wa tseyitha kutya nonando haku dhidhilikwa iipotha yokudhipaga oompanda shaali paveta mpeya naampeya, uupyakandhi owa shonopala, okuyelekanitha nomimvo dha piti.

Sha ikolela komwaalu gomumvo 2022, oompanda ashike 33 dha ndhipagwa kaashili paveta, omugoyi oontokele omanga 24 oondundhe. Nuumvo inaku pitithwa omwaalu goompanda dha dhipagwa shaali paveta.

“Oompanda ndhoka dha ndhipagwa 33, ondho koofalama ndhii kalekelwa, ndhi li omugoyi okoofalama ndhopaumwene omanga ndhi li 15 ondho mEtosha,” yali ya fatulula ngaaka. Ya ti, okuza mo2017 oompanda ndhi li 55 odha dhipagwa, 2018 odhi li 83, 2019 odhi li 57 mo mo2020 odhi li 42 omanga mo2021 mwa ndhipagwa ndhi li 44.

“Ota tu tsikile okulonga nuundhiginini okugamena iiyamakuti ya gamenwa, kaayi ndhipagwe kaashili paveta,”ya nyola ngaaka.

Ya tsikile kutya , shoka otashi ka kala oshipu uuna oshigwana tashi longele kumwe nopolisi, naatili osho wo aanambelewa muuministeli womindhingoloko okulopota iiningwanima yolundhi nduka. Uuministeli owa ti, oondjamba inadhi taalela uunene uupyakandhi woku ndhipagwa, okuyeleka noompanda.

“Okuza 2017 oondjamba ndhi li 50 okwa li dha dhipagwa, 2018 odha li 27, 2019 odha li 13, 2020 odha li 12 omanga 2021 dha li ashike hetatu,’’ ya totha mo ngaaka.

Ta ti, omwaalu ngoka ota gu ulike lela gwa shonopala, naashoka otashi ulike nkene aagameni yiiyamakutu taya longo ya itula mo.

Aanambelwa yokugamena iiyamakuti mEtosha oya kala noku kumagidha oshigwana shi hulithe po okudhipaga iiyamakuti ya gamenwa mEtosha.

“Iiyamakuti ngaashi oompanda, oondjamba osho wo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” ya ti ngaaka. Taya ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambandhala okulongitha oompito adhihe, okukonda ooveta ndhoka.

“Otwa ndhindhilike kutya aantu mboka haya dhipaga iiyamakuti ya gamenwa, aanafaalama ye li unene moluhepo taya tumwa kaanangeshefa osho wo kaaniilonga aakuluntu yepangelo, yo taya ka futwa,” ya fatulula ngaaka.

Aagameni yiiyamakuti mEtosha omimvo dha piti oya longa nuudhiginini, oshoka omwaalu gwiipotha ya lopota ogwa shuna pevi, ngele tagu yelekwa niipotha yomimvo dha piti. -vkaapanda@nepc.com.na

The post Kwa dhimbulukwa esiku lyoompanda muuyuni… okudhipaga oompanda kwa shonopala appeared first on New Era.