Meekulu Penexupifo Pohamba a pakwa

OKANGHUDI- Ovanamibia omayovi mwa kwatelwa Omupresidente Netumbo Nandi-Ndaitwah okwa li va holoka momwaalu muhapu komukunda Okanghudi, okuyandja efimaneko lavo laxuuninwa kunakufya omunyekadi Penehupifo Pohamba.

Okwa fudikwa Olomakaya komaendo ofamili yavo e li ashike mekove lavo. Pohamba okwa xulifa momafiku 17 omwedi wa dja ko koshipangelo moWindhoek. Okwa li e na omido 78. Okwa fiya po ounona vaye vatanho osho yo omushamane waye Omupresidente omutivali Hifikepunye Pohamba.

Okwa fiya po vamwaina vatanho. Moshipoiwa shaye, Omupresidente Netumbo Nandi- Ndaitwah okwa tanga nanakufya omunyekadi omutivali Penehupifo Pohamba kutya okwa li e na oshisho novakainhu osho yo ounona eshi a dana onghandangala ya kula okuvayambidida. Namibia ota li li omukainhu omunambili a longo nelitulemo nelalakano lokuyandjaneka omayakulo ouhaku. Okwa ti Pohamba okwa kala nokutumbalekwa eshi a pewa omapapa lwoikando ya yooloka okudja kondje yoshilongo molwaashi a longa nondjungu.

“Otwa pandula oilonga iwa a longa okukala ta yambidida Ovanamibia. Okwa fiya po oshihopaenenwa shiwa sha pumbwa okulandulwa kovanyasha,” ta ti.

Nandi-Ndaitwah okwa li a holoka kefiku lexupulifo osho yo efiku lepako nelalakano lokutopolafana oluhodi navakwao. Okwa ti okwa shakeneka Pohamba omudo 1963 kOdibo pefimbo olo va li ovanafikola. Okwa ti okwa kala a talako Pohamba onga omukulu waye molwaashi okwa li e na oukwaya muwa wa pumbwa okulandulwa.

“Okwa li omunafikola e na omaano. Okwa li a dana oudano wokatanga komokambamba. Okwa li omunyasha e hole elandulafano, efimbo keshe ta yolo. NNN okwa ti okwa li e hole alushe okutala ngeenge Pohamba ta dana okatanga komokambamba shaashi okwa li enyakwa ha li nuka mokule.

Okwa hokolola ta ti Pohamba omukainhu a shitika e na ouwa neexwiki diwa osho yo omesho a toka.

“Okwa li hatu mu ufana Kambosho pefimbo tu li kofikola. Okwa li e hole edina laye, ye te li memesha ngeenge hatu mu ufana,” ta ti.

Omupresidente okwa ti omafiku 7 Okotoba, okwa li a taalela po Pohamba pefimbo e li koshipangelo.

“Okwa li lombwela nge ndi mu faneke efano. Okwa ti nandi li tumine omushamane waye Pohamba,” ta ti.

“Omwenyo waye nautulumukwe mombili.”

Moshipopiwa shaye, omushamane waye Hifikepunye Pohamba okwa ti okwa kanifa omukulukadi omunambili, omutekuli omuyambididi waye efimbo keshe kwa li.

“Edje po laye ola fiya po omwa ka wa kula. Onda kala nomukulukadi wange tuna ombili okudja efiku twa shakena,” ta ti.

Okwa ti ova hombola momudo 1983 ashike ova kala vena oukumwe nelandulafano.

“Omukulukadi wange ka kwa li ena okatongo. Okwa yambidida ovanhu vahapu momukunda wetu osho yo koitukulwa ya yooloka,” ta ti. Ounona vaPohamba otanga ina tava ti okwa li e hole elandufano molwaashi okwe va tekulila oukriste nokukala va fimaneka ovanhu. Omunyekadi omitatu Monica Geingos okwa tanga nakufya omunyekadi omutivali Pohamba kutya oye kwa li omupukululi waye, omuyandji mayelele a kala te mu pukulula okudja omudo 2015 eshi a ninga omunyekadi woshilongo. Okwa ti okwa kanifa kahewa kaye, omukulu waye, omunambili alushe ena oshipala tashi yolo shi yadi ombili.

“Onda kala ndi na ekwatafano liwa naye. Alushe ngeenge nda nyengwa koilonga yombelewa yange pefimbo nda li omunyekadi ohadi mu dengele ongodi handi pula omayelele,” ta ti.

Geingos okwa hokolola ta ti Pohamba okwa fiya po oshihopaenenwa shiwa sha pumbwa okulandulwa kovanyasha. “Otwa pandula oilonga iwa aishe a longa ngaashi okuyambidida ovakainhu ve li umbata,” ta ti.

Ova popi va yooloka ova tanga nakufya omunyekadi tava oye kwa li ina yoshiwana molwaashi ka kwa li e na okatongo osho yo okwa li e hole ovanhu.

*[email protected] *

The post Meekulu Penexupifo Pohamba a pakwa appeared first on New Era.